Бу ураты күҥҥэ Үөһээ Бүлүү сэлиэнньэтин Билиилээх түөлбэ салайааччыта Наталья Васильева быһаччы көҕүлээһининэн, улууска биллэр асчыт, кондитер Сусанна Мачахова-Николаева эрдэттэн бэлэмнээн астаабыт тортарын элбэх оҕолоох тоҕус ийэҕэ дьиэлэригэр илдьэн биэрэн, истиҥник эҕэрдэлээн, барыларын соһуттулар, умнуллубат кэрэ-бэлиэ түгэни бэлэхтээтилэр. Ийэлэр ортолоругар 92 саастаах ытык-мааны хос эбээ, далбар хотун Екатерина Федотовна Давыдова баар.
Түгэнинэн туһанан, «Ил Түмэн» издательскэй дьиэ кэлэктиибэ Саха сирин ытык-мааны ийэлэрин ис сүрэҕиттэн итиитик-истиҥник эҕэрдэлиир. Бу ураты бэлиэ күн бэлиэтэнэр буолбута хаһыс да сылыгар баран, үтүө үгэскэ кубулуйда. Бу ураты бырааһынньык кыһын кэлэрин түстүүр маҥнайгы, сылаас, нарын хаар түһэрин кытта арыалдьыттанан бэлиэтэнэрэ ураты көстүүнү саҕар. Ийэлэрбит барахсаттар эһиги маҥнайгы хаар курдук өрүү ырааһы түстүүгүт, маҥнайгы хаар сылаас нуолурун курдук өрүү сылааһынан сыдьаайаҕыт, маҥнайгы хаар быйаҥы түстүүрүн курдук эһиги баай-талым астаах остуоллааххыт! Күндү дьоммутугар дьолу-соргуну, кэрэни-үтүөнү баҕарабыт!
-
0
-
0
-
0
-
0
-
0
-
0
