Ыҥырыылаах ыалдьыттары Таатта кыраныыссатыгар Тыараһа нэһилиэгин баһылыга Святослав Сунхалыров, «Алгыс» норуот айымньытын дьиэтин үлэһиттэрэ арыылаах алаадьынан айах тутан, кылыһахтаах тойугунан уруйдаан-айхаллаан көрүстүлэр.
Тааттатааҕы народнай тыйаатырга Ананий Андреев төрөөбүтэ 125 сылыгар быыстапка тардылынна. И.Аргунов аатынан улуустааҕы киин библиотека үлэһитэ Светлана Семеновна Игнатьева Ананий Кононович туһунан кинигэлэр быыстапкаларын үөрүүлээх тэрээһиҥҥэ кэлбит дьоҥҥо сырдатан кэпсээтэ.
Боробул сэлиэнньэтигэр үтүө үгэскэ кубулуйбут бастакы Нарком пааматынньыгар сүгүрүйүү сиэрэ-туома, тыыннаах сибэккилэри ууруу ыытылынна. А.Е.Кулаковскай аатынан Дьохсоҕон орто оскуолатын үөрэнээччилэрэ А.К.Андреев олоҕор уонна сүдү кылаатыгар анаммыт хоһооннору сэргэхтик ааҕан, истиҥ эҕэрдэ тылларынан дьоһун тэрээһин өрөгөйүн өссө күүһүртүлэр.
Үбүлүөйдээх тэрээһин үөрүүлээх чааһа Таатта-тааҕы тыйаатырга өрө көтөҕүллүүлээхтик ыытылынна. Тэрээһиҥҥэ СӨ ОДьКХ ГУП генеральнай дириэктирэ Виталий Чикачев, улуус баһылыга Айаал Бурцев, улуус мунньаҕын бэрэссэдээтэлэ Петр Максимов, Ытык Күөл баһылыга Егор Павлов, Дьохсоҕон баһылыга Валентин Охотин, республика ОДьКХ филиалларын салайааччылара, улуустааҕы ОДьКХ, РЭС үлэһиттэрэ, бэтэрээннэрэ, Дьохсоҕон нэһилиэгин олохтоохторо, ыҥырыылаах ыалдьыттар кыттыыны ыллылар.
Дьохсоҕоннооҕу норуот айымньытын дьиэтин туруоруутугар Ананий Андреев олоҕун оҥкулларынан «Улуукан уолбут — хоодуот хотойбут» диэн дьүһүйүүнү тэрээһин кыттыылаахтара олус сэргии көрдүлэр.
СР Национальнай архыыбын докумуоннарын наукаҕа туттуу отделын кылаабынай архивиһа Вячеслав Сергеевич Сивцев Ананий Кононович устуоруйа чахчыларыгар олоҕуран үлэтин-хамнаһын сырдатар иһитиннэрии оҥордо.
ОДьКХ ГУП генеральнай дириэктирэ Виталий Семенович Чикачев Ананий Андреевы үйэтитии үлэтэ салҕанан бара турарын этэн туран, бу хайысхаҕа сүҥкэн үлэни ыытар ОДьКХ түмэлин сэбиэдиссэйигэр Галина Егоровна Арылаховаҕа тус махталын биллэрдэ. Дьокуускай куорат уотунан, уунан, ититиинэн хааччыллан олоруута – бу Ананий Андреев уурбут олуга диэн тоһоҕолоон бэлиэтээтэ. Ананий Андреев аатынан стипендиат үрдүк аатын ылбыт А.Е.Кулаковскай аатын сүгэр Дьохсоҕон орто оскуолатын выпускнигар, Дьокуускайдааҕы технологическай техникум устудьуонугар Максим Поповка 50000 суумалаах сертификат туттарда. Коммунальнай хаһаайыстыба эйгэтигэр Ананий Андреев аата өрүү үрдүктүк тутуллуохтаах диэн этиитин тэрээһин кыттыылаахтара «ГУП! ГУП! УРАА!» диэн үс төгүл хаһыытаан бигэргэттилэр.
Бу үөрүүлээх күҥҥэ ОДьКХ үлэһиттэригэр, Ананий Андреевы үйэтитиигэ кылааттаах учууталларга, библиотекарьдарга улуус, республика таһымнаах наҕараадалар туттарылыннылар. ОДЬКХ ГУП генеральнай дириэктиригэр Виталий Семенович Чикачевка «Дьохсоҕон нэһилиэгин бочуоттаах олохтооҕо» диэн үрдүк ааты иҥэрбиттэрин нэһилиэк баһылыга Валентин Андреевич Охотин иһитиннэрэн туран, ону туоһулуур бэлиэни дохсун ытыс тыаһынан доҕуһуоллатан бар дьон ортотугар туттарда. Тэрээһин дьүһүйүүнэн саҕаланан баран, театрализованнай хоһооннорунан туруоруунан түмүктэннэ. Ол туһунан "Таатта" хаһыат саайта иһитиннэрэр.
Ааптар хаартыскаҕа түһэриитэ.
-
0
-
0
-
0
-
0
-
0
-
0
