Ст. Васильев аатынан Ньурбатааҕы элбэх хайысхалаах гимназия математикаҕа учуутала Анфиса Афанасьевна Николаева М.А.Алексеев аатынан Судаарыстыбаннай бириэмийэ лауреата буолла! Эмиэ бу оскуола физикаҕа учуутала Сардана Михайловна Миронова 100 тыһ. солк. суумалаах СӨ Ил Дарханын «Саха сирин педагог-настаабынньыга» бириэмийэнэн бэлиэтэннэ.
Гимназия дириэктэрэ Валентина Романовна Васильева санаатын маннык үллэстэр: «Учуутал күнүгэр гимназияҕа икки киһибит маннык улахан наҕараадаҕа тиксибиттэрэ – улахан чиэс. Анфиса Афанасьевна СӨ норуодунай учуутала М.А.Алексеев аатынан Госпремияны ылыан ылла диибит. Олоҕун учуутал идэтигэр анаан, олус эппиэтинэстээхтик уонна таһаарыылаахтык, оҕолору кытта уопсай тылы булан үлэлии сылдьар.
Быйылгы үөрэх дьылыгар биһиги гимназиябыт ГИА түмүгүнэн өрөспүүбүлүкэҕэ бастыҥ оскуолалар истэригэр киирдэ. Итинэн биһиги киэн туттабыт. Манна А.А.Николаева уонна С.М.Миронова кылааттара эмиэ улахан. Иккиэн хайдах үлэлиэхтэриттэн олус айымньылаахтык, оҕолорго сүрэхтэрин-дууһаларын, өйдөрүн-санааларын ууран туран, кинилэргэ билиини биэрэр туһугар бириэмэни аахсыбакка үлэлииллэр.
Сардана Михайловна физикаҕа баар-суох учууталбыт. Сардана Михайловна педагог-настаабынньык быһыытынан эдэр педагогтарга мэлдьи сүбэлиир-амалыыр. Кини такайан үүннэрэн таһаарбыт педагогтара элбэхтэр. Иккиэннэринэн биһиги киэн туттабыт уонна олус үөрэбит». Ол туһунан Ньурба хаһыат иһитиннэрэр.
Хаартыска: Ньурба хаһыат эрэдээксийэтэ.
-
0
-
0
-
0
-
0
-
0
-
0
