Бу бэлиэ күн биhиэхэ дириҥ историческай суолталаах. Түөрт үйэ анараа өттүгэр Арассыыйа норуоттара дойдубутун көмүскүүр туhугар биир сомоҕо буолан турууласпыттара. Кинилэр хорсун быһыылара кэлэр көлүөнэлэргэ доҕордоhуу уонна түмсүү холобура буолбута, дойдубут сүрүн күүhэ сомоҕолоhуу буоларын көрдөрбүтэ.
Элбэх омук олорор Саха Өрөспүүбүлүкэтигэр бу кэм көннөрү история кэрчигэ буолбатах, бу — биһиги күннээҕи олохпутугар сомоҕолоhуу тыын суолтатын бэлиэтиир. Тыйыс айылҕалаах хотугу дойдубутугар бииргэ үлэлээтэхпитинэ-хамсаатахпытына, хардарыта көмөлөhүcтэхпитинэ, түмүстэхпитинэ эрэ олохпут туруктаах буолар.
Быйылгы сыл биһиэхэ ураты суолталаах. Арассыыйаҕа Норуот сомоҕолоһуутун сыла, оттон өрөспүүбүлүкэбитигэр — Култуура сыла бэлиэтэнэр. Бу өйдөбүллэр быстыспат ситимнээхтэр. Култуура — көлүөнэлэри холбуур, устуоруйа өйдөбүнньүгүн хараанныыр, дойдубутугар олорор норуоттар үгэстэрин хардарыта байытар, духуобунай эйгэлэрин кэҥэтэр сүдү күүс. Билиҥҥи кэмҥэ Саха сиригэр араас култууралаах уонна итэҕэллээх дьону ситимниир бэлиэ тэрээһиннэр ыытыллаллар. Алтынньыга өрөспүүбүлүкэ парламентарийдара норуоттар уонна эрэгийиэннэр икки ардыларынааҕы былаһааккаларга кыттыбыттара, сүрүн тэрийээччи буолбуттара. «Норуоттар эйэлэрин уонна сомоҕолоһууларын туһугар бииргэ үлэлээһин» I Норуоттар икки ардыларынааҕы форум чэрчитинэн култуура үгэстэрин харыстааһын уонна норуот дипломатиятын сайыннарыы боппуруостара ырытыллыбыттара. Өрөспүүбүлүкэ Ыччатын парламенын көҕүлээһининэн «Норуоттар сомоҕолоһуулара — Уһук Илин уонна Арктика сайдыытын стратегията» IV Николаевскай форум Уһук Илиҥҥи федеральнай уокурук уонна Арассыыйа Арктикатын зонатын биэс эрэгийиэннэрин эдэр лиидэрдэрин түмпүтэ. Маннык аһаҕас кэпсэтиилэр былаhааккаларыгар көлүөнэлэр, норуоттар икки ардыларыгар ситим бөҕөргүүр, өрөспүүбүлүкэбит уонна дойдубут инники кэскилэ түстэнэр.
Күндү Сахам сирин дьоно! Эһиэхэ кытаанах доруобуйаны, уостубат эрчими, алаһа дьиэҕитигэр уйгуну-быйаҥы, иллээх олоҕу уонна үтүөнү баҕарабын. Биһиги сомоҕо күүспүт, норуоттар үйэлээх доҕордоһууларыгар олоҕурбут айар-тутар үлэбит саҥа кыайыыларга, ситиһиилэргэ сирдии туруохтун!
Саха Өрөспүүбүлүкэтин Ил Түмэнин
Бэрэссэдээтэлэ А.И. Еремеев
Хаартыскаҕа Василий Кононов түһэриитэ.
-
1
-
0
-
0
-
0
-
0
-
0
