Ол курдук, Дьокуускай куоракка Петр Бекетов пааматынньыгын былаһааккатыгар Норуот сомоҕолоһуутун күнүгэр аналлаах миитин-кэнсиэргэ үгүс дьон тоҕуоруһа муһуннулар, Сомоҕолоһуу оһуохайа элбэх киһини түмэн, Туймаада эбэ үрдүнэн сахалыы дорҕоон сатараата.
Үөрүүлээх тэрээһиҥҥэ СӨ Бырабыыталыстыбатын бэрэссэдээтэлэ Кирилл Бычков, Арассыыйа Дьоруойа Александр Находкин, Ил Түмэн дьокутааттара, уопсастыбанньыттар кыттыыны ыллылар.
Эмиэ бу күн Уопсастыбаннай киин аактабай саалатыгар «Сомоҕолоһуу тэтиминэн» («В ритме единства») диэн Дьокуускай куорат уокуруктарын үҥкүү самодеятельнай кэлэктииптэрин икки ардыларыгар куораттааҕы куонкурус ыытылынна.
Киэһэлик Өскөкүлээх Өлөксөй аатынан Норуоттар доҕордоһууларын дьиэтигэр «Саха сирин ис кута, Арассыыйа ис кута (дууһата)» диэн бырааһынньыктааҕы кэнсиэргэ элбэх киһи сырытта.
Оттон куорат таһынааҕы Табаҕаҕа «Кедр» култуура дьиэтигэр «Бары бииргэбит» диэн Аһымал санаа кэнсиэрэ ыытыллан, киирбит үп Анал байыаннай дьайыы кыттыылаахтарыгар көмөҕө барыаҕа.
ххх
Бырааһынньыктааҕы күн Дьокуускайга «Арассыыйа— мин устуоруйам» түмэлгэ «Арассыыйа фашизмы утары» пуорум чэрчитинэн Анал байыаннай дьайыы суонатыттан трофейнай тиэхиньикэ быыстапкатын тэрээһинэ ыытылынна. Ыалдьыттарга быыстапканы билиһиннэрии экскурсия быһыытынан барда.
Бу күн тэрээһиҥҥэ кыттыбыт дьон Анал байыаннай дьайыы толоонуттан аҕалыллыбыт сэрии сэптэрин, экраҥҥа устуулары, хаартыскалары көрдүлэр. Быыстапканы көрөөччүлэр ортолоругар өрөспүүбүлүкэ бырабыыталыстыбатын салайааччылара, Арассыыйа Федерациятын Дьоруойдара Николай Евдокимов, Филипп Евсеев, Александр Колесов, Родимир Максимов, Илиҥҥи байыаннай уокурук бэрэстэбиитэллэрэ уонна Анал байыаннай дьайыыттан кэлбит 28 байыас сырыттылар.
ххх
Сэтинньи 4 күнүгэр 1612 сыллаахха Кузьма Минин уонна Дмитрий Пожарскай салалтатынан норуот дружината Москубаны Польша-Литва халабырдьыттарыттан босхолообута.
Бу күнү судаарыстыбаннай бырааһынньык күнүнэн билинэр туһунан Госдуума дьокутааттара 2004 сыл ахсынньы 16 күнүгэр куоластаабыттара.
Хаартыскалар Вадим Скрябин, ЯСИА түһэриилэрэ, Саха гов.ру
-
2
-
0
-
0
-
0
-
0
-
0
