Бу күн кыттааччылар сарсыарда 11 чаастан Нам Модутун Хомуньуустар искибиэрэдэриттэн стартаатылар. Сүүрүү салгыы: Модут сэлиэнньэтэ - Хатырык сэлиэнньэтэ - Устуоруйа түмэлэ тиийэн түмүктэннэ. Уопсай уһуна 20 км. Сүүрүүгэ уопсайа 42 киһи кытынна, ол иһигэр Дьокуускайтан, Намтан сүүрүү кулууптарын чилиэннэрэ, устудьуоннар, аҕам саастаахтар уонна олохтоохтор сүүрдүлэр. Бу күн халлаан 31 кыраадыска тиийдэ.
Сүүрүүнү тэрийээччилэринэн Хотугулуу-Илиҥҥи федеральнай үнэбэрсиэт уонна Нам улууһун Модут нэһилиэгин дьаһалтата буоллулар. Успуорту, чэбдигирдиини уонна үөрэҕи-билиини ситимниир ураты тэрээһин биллиилээх судаарыстыбаннай -бэлитиичэскэй диэйэтэллэр Илья Егорович Винокуров 130 сылыгар анаан уонна Максим Кирович Аммосов 140 сылыгар (2027 с.) бэлэмнэнии быһыытынан ыытылынна.
Модут-Хатырык уһуну сүүрүү кыттыылаахтарын ортотугар бэрт уопуттаах сүүрүктэр уонна араас таһымнаах күрэхтэһиилэргэ сүүрэр марафонецтар баалар. Кинилэр ортолоругар Дьокуускайтан Любомир Борисов сүүрдэ. Кини бу ураты сүүрүүнү сэргээн, ол туһунан бу курдук билиһиннэрэр.
- Дистанция уопсайа 16 км диэн этэ да, түмүгэр 20 км тиийдэ. Модуттан айан суолун устун сүүрэн Хатырыкка кэллибит. Сарсыарда 11 саҕалаабыппыт. Сүүрүктэр бары тымныыга анал экипировкалаах кытынныбыт. Сүүрүү бэрт уратытык барда. Кыраайы үөрэтиигэ аналлаах буолан, сүүрэн иһэммит бэлиэ сирдэргэ, дьиэлэргэ, пааматынньыктарга тохтобул оҥорон кылгас кэмнээх устуоруйа экскурсун иһиттибит, көрдүбүт. Бэрт интэриэһинэй. Сүүрээччилэр састааппыт эмиэ араастаах, кырдьаҕастар, дьахталлар, эдэрдэр, уопуттаахтар уонна саҥа саҕалаачччылар эмиэ бааллар. Уопсайа сүүрүүгэ бэйэтигэр 2 ч 30 мүнүүтэ барда.
-
Уһуну сүүрүүнү ХИФУ физкультураҕа уонна успуортка факультетын декана Николай Гоголев уонна Модут нэһилиэгин баһылыга Ефим Гоголев бэрт тэрээһиннээхтик иилээн-саҕалаан ыыттылар.
Бэйэм уһун дистанацияҕа сүүрүүнэн 2019 сыллаахтан дьарыктанабын. 2023 сылтан официальнай күрэхтэһиилэргэ кыттан саҕалаабытым. Араас дистанцияларга 3-5-10-21 килэмиэтирдэргэ сүүрэбин. Холобура, Казань полумарофонугар, салгыы Питер, Москуба полумарофоннрагыар бэйэбин холоммутум. Быйыл балаҕан ыйын 27 күнүгэр Казахстааҥҥа Алматы 15-с үбүлүөйдээх марафонугар кыахпын толору туһанан кытынным. Бу күрэхтэр бары норуоттар икки ардыларынааҕы таһымнаахтар.
2026 саҕаланыытыгар тохсунньуга Өймөкөөҥҥө «Тымныы полюһа» экстремальнай марафонскай сүүрүүгэ бэйэбин бэрэбиэркэлэнэн көрдүм уонна ситиһиилээхтик кытынным диэхпин сөп.
Уһуну сүүрээччилэр бэйэбит бөлөхпүтүнэн сылы эргиччи дьарыктанабыт. 2025 сылтан мин кыһыннары тохтообокко сүүрэбин, - диэн Любомир Дмитриевич билиһиннэрдэ. Марафанец бэйэтэ Бүлүүттэн төрүттээх, «Арктик-Капитал» ХЭТ үлэлиир.
Сүүрүккэ инникитин успуорка ситиһиилэри уонна чэгиэн доруобуйаны баҕарабыт!
Алексей МАТВЕЕВ
Хаартыскалар Люлмир Борисов тиксэриитинэн
-
0
-
0
-
0
-
0
-
0
-
0
