Дмитрий Викторович Бердников ыаллыы Иркутскай уобалас Ангарскай куоратыгар 1966 сыллаахха төрөөбүт. Иркутскайдааҕы политехническэй институкка үөрэнэн, тутуу инженерин идэтин ылбыт. Иккис үрдүк үөрэҕэ – юрист. Үлэтин “ВостокСантехМонтаж” трест маастарынан саҕалаабыт уонна кылаабынай инженеринэн түмүктээбит. Коммерческай тэрилтэ салалтатыгар үлэлии сылдьан, 2014 сыллаахха балаҕан ыйынааҕы быыбарга Иркутскай куорат дьокутаатынан, мунньах бэрэссэдээтэлинэн талыллан үлэлээбит.
Онтон 2015 сыл кулун тутар 27 күнүгэр Иркутскай куорат мэринэн талыллан, биэс сыл толору олорбут. Быйыл саас кулун тутартан Иркутскай уобалас күбүрүнээтэрин бастакы солбуйааччы эбээһинэһин толорооччунан анаммыт эбит. Уобалас парламеныгар иккитэ бигэргэтиигэ киирбитин ылымматахтар. Биир дойдулаахтара туохтан өстүйэн “саа тэбиитигэр чугаһаппатахтара” биллибэт.
Арай, манна тоҕо кэлбитэ биллэр: Дмитрий Бердников Өлүөнэ өрүһү туоруур муоста тутуутун тэрийиэхтээх уонна тутуу үлэтин ыыттарыахтаах. Онуоха киниттэн федеральнай, эрэгийиэннээҕи уонна муниципальнай былаастар икки ардыларыгар үлэни сүрүннээһини күүһүрдэр эрэйиллэр.
Кини билиҥҥитэ “Саха Өрөспүүбүлүкэтин бырабыыталыстыбатын бэрэссэдээтэлин бастакы солбуйааччытын эбээһинэһин толорооччунан” ананна. Ол туһунан Ил Дархан ыйааҕа бэҕэһээ, сэтинньи 12 күнүгэр, таҕыста. Күөспүт аһара туустаммата дуо? Ил Түмэн дьокутааттара Ил Дархаҥҥа эмиэ сөбүлэҥнэрин биэрэн, бигэргэттэриэхтэрэ дуо?
Павел Ксенофонтов, Ил Түмэн дьокутаата:
-Биһиги дьоммут “куһаҕан киһи эбит” диэн түргэн баҕайытык сыана быһа охсор идэлээхтэр. Мин ону кытта сөпсөспөппүн. Ыксыыр-ыгылыйар сатаммат. Арассыыйа биир улахан субъега буоларбытын умнуо суохтаахпыт. Саҥа салайааччыны көрөн-истэн, үөрэтэн-чинчилээн эрэ баран, хайдах-туох киһитин билиэххэ сөп. Онон сиэссийэҕэ диэри толкуйданарга бириэмэ баар...
Хос быһаарыы: хас даҕаны дьокутаакка эрийэн, санааларын истээри гыммытым табыллыбата, бары үтүктүспүт курдук: “Билбэт киһим. Онон туттунабын”, -- диэтилэр.
-
0
-
0
-
0
-
0
-
0
-
0
