Саха сирин 13 улууһугар бүгүн -50 намыһах кыраадыс бэлиэтэммит. Өрөспүүбүлүкэтээҕи гидрометеорология управлениета иһитиннэрбитинэн, Үөһээ Дьааҥы Баатаҕайыгар -50 кыраадыс, Үөһээ Дьааҥыга – 56 кыраадыс тымныы буолбут. Тымныы полюһугар – Өймөкөөҥҥө -51 кыраадыс тымныйбыт. Бүлүү, Үөһээ Бүлүү, Ньурба, Сунтаар, Горнай уонна Хаҥалас улуустарыгар -50 кыраадыс тымныы буолбут. Томпо, Чурапчы, Уус Майа улуустарыгар -53 кыраадыска диэри тымныйбыт. Намҥа -52, Тааттаҕа -54, Аммаҕа -54 кыраадыстар бэлиэтэммиттэр.
Бу тымныылар норуот синоптика Тускул сабаҕалаабытын курдук сатыылаатылар. Кини бу намыһах температуралар Кириһиэнньэ тымныытыгар “бэлэмнэнии” буоларын ыйбыт. Тускул этэринэн киин улуустарга Кириһиэнньэ саҕана тохсунньу 17-19 күннэригэр түүн 55 -54 , күнүс -44 -45 кыраадыс тымныйар. Бүлүү бөлөх улуустарыгар бу тымныылар эмиэ биллиэхтэрэ. Тохсунньу 19 күнүгэр -49 кыраадыска диэри тымныйыа диэн Тускул сабаҕалыыр.
Тускул Кириһиэнньэҕэ хайдах температура буоларын маннык билгэлиир:
Соҕурулуу—арҕаа Өлүөхүмэ уонна Ленскэй улуустарыгар билигин -32 -20 кыраадыс тымныы турар эрээри, тохсунньу 12 күнүттэн -40 -38 кыраадыс тымныйыаҕа. Тохсунньу 18-19 күннэригэр, -42 -43 кыраадыс буолуоҕа. Өскөтүн маннык кыраадыс киин уонна хоту улуустарга «ичигэс күн» дэнэр эбит буоллаҕына, бу эҥэр улахан тымныынан ааҕыллар.
Эдьигээн, Кэбээйи улуустарыгар тохсунньу 18-19 күннэригэр -50 кыраадыстан лаппа түһүөҕэ. Тымныы полюһугар Өймөкөөҥҥө күн-дьыл туруга хамсыы турар — былытыран да, тымныйан да ылар. Бу күннэргэ Өймөкөөҥҥө «сымнаҕас» күн-дьыл турар — -48 -47 кыраадыс. Тохсунньу 15-16 күннэригэр манна -52 -53 кыраадыс тымныйыаҕа. Кириһиэнньэҕэ, тохсунньу 17 күнүттэн Тымныы полюһугар былытыран, -44 -45 кыраадыс тымныы буолуоҕа. Маннык кыраадыһы өймөкөөннөр «олох сылаас» күнүнэн ааҕаллар.
Дьааҥыга улахан тымныы суох. Кириһиэнньэ саҕана, тохсунньу 14 -17 күннэригэр, -54 -55 кыраадыс тымныйыаҕа.
Халыма—Индигиир улуустарыгар тохсунньу 11 күнүттэн -47 -50 кыраадыс тымныйыаҕа. Тохсунньу 16 күнүгэр былытырыаҕа.
Өлөөҥҥө тохсунньу 11 күнүттэн -48 -49 кыраадыс тымныйыаҕа. Тохсунньу 15 күнүгэр -50 буолуоҕа. Маннык тымныы кыраадыс Өлөөҥҥө хаһан да бэлиэтэнэ илик.
Булуҥ, Анаабыр улуустарыгар күүстээх буурҕа түһэн ылла. Бу кэнниттэн тохсунньу 12 күнүгэр -32 -42 тымныйыаҕа.
-
0
-
0
-
0
-
0
-
0
-
0
