Биһиги Национальнай бибилэтиэкэ исписэлииһэ Сардаана Алексееваҕа тахсан үлэ хайдах тэриллэн эрэрин ыйыттыбыт. «Биһиги бибилэтиэкэбит олунньу 1 күнүттэн ааҕар саалатын аспыта. Үс ааҕар саалалаахпыт, биир кэмҥэ 5-тэн элбэҕэ суох киһини киллэрэбит. Ирдэнэр харыстанар миэрэлэри барытын тутуһабыт. Ааҕар саалаҕа үлэлии кэлбит дьон бэйэ-бэйэтиттэн тэйиччи олорор. Өссө биир ирдэбил диэн, ааҕааччылар эрдэттэн суруттаран баран кэлиэхтээхтэр. Биһиги бибилэтиэкэбитигэр 455-855 төлөпүөн нүөмэринэн суруттараллар. Ханнык күҥҥэ, хаска кэлэллэрин уонна төһө өр олороллорун, кинигэ ыла эбэтэр туттара кэлэллэрин этиэхтээхтэр. Ааҕар саалаларга мааскалаах уонна бэрчээккилээх эрэ киллэрэбит», -- диэн Сардаана Васильевна быһаарда.
Ааҕааччылар төннөрбүт кинигэлэрэ 5 күн харантыыҥҥа харайыллаллар, дьоҥҥо бэриллибэттэр. Бибилэтиэкэлэргэ кулууптар уонна куруһуоктар тэрээһиннэрэ ыытыллаллара көҥүллэнэр. Маны таһынан бибилэтиэкэҕэ кэлбит киһи докумуону толороругар тус уруучукалаах сылдьара биһирэнэр. Ол туһунан Дьокуускай куораттааҕы кииннэммит бибилэтиэкэ ситимин саайтыгар суруллубут.
-
0
-
0
-
0
-
0
-
0
-
0
