Үөһээ Бүлүү улууһун баһылыга Владимир Поскачин улуус олохтоохторун бу бэлиэ күнүнэн эҕэрдэлииригэр: “Үөһээ Бүлүүбүт 86 сыл устатыгар бигэ олохтоох-дьаһахтаах, интеллектуальнай-духуобунай баайдаах биир биллэр-көстөр улуус буола сайынна. Баараҕай таас тутуулар, бөҕө оҥоһуулаах суоллар, аспааллаах уулуссалар, Чыбыыдабыт таас муостата, гаас оттук, суотабай сибээс, түргэн интэриниэт барыта – улууспут сайдыытын туоһулууллар. Сотору кэминэн Бүлүү эбэбитин туоруур муоста тутуллуо. Төрөөбүт-үөскээбит Үөһээ Бүлүүлэрин аар саарга ааттатар учуонайдарбытынан, суруйааччыларбытынан, ырыаһыттарбытынан, артыыстарбытынан, норуот талба талааннаахтарынан, спортсменнарбытынан киэн туттабыт. “Үс хоһууннаах” үөһээ бүлүүлэр 2017 сыллаахха Манчаары оонньууларын үрдүк таһымнаахтык тэрийэн ыыппыппыт, биһиги улууспут сүүмэрдэммит хамаандата элбэх сыллаах уоскулаҥ кэнниттэн кыайыы өрөгөйүн билбитэ. Бу тэтиммитин аны сайын Куорунайга ыытыллар Манчаары оонньууларыгар хатылыах тустаахпыт. Эһиил өрөспүүбүлүкэбит төрүттэммитэ 100 сылын туоларыгар аналлаах Олоҥхо ыһыаҕын эмиэ үрдүк таһымнаахтык тэрийэн ыытарбытыгар эрэнэбин. Онтон 2023 сылга биллиилээх биир дойдулаахпыт, саха уһулуччулаах уолун, Саха АССР Совнаркомун бастакы бэрэссэдээтэлин, учуонай-экэнэмиис Исидор Барахов төрөөбүтэ 125 сылын өрө көтөҕүллэн туран бэлиэтиэхпит. Онон, күндү доҕоттор, биһигини инникитин үгүс түбүк, үрдүк үөрүү күүтэр. Үөһээ бүлүүлэр, иннибит диэки!” – диэтэ.
Үөһээ Бүлүүм, үүнэ тур!
Хайдах курдук тубуста
Үөһээ Бүлүүм олоҕо,
Кэлэн сэргэ хаамыста
Остуоруйа олоҕо.
Таҕыстыҥ да налыччы
Аспаалынан хаамаҕын,
Тула көрөн бөһүөлэгиҥ
Тупсубутун сөҕөҕүн.
Олоҥхоҕо хоһуллар
Киирбэт күннээх дойдулуу,
Түүҥҥү уота сандаарар,
Дьүүкэбиллии суһумнуу.
Олоруохха үчүгэй:
Оннук кэрэ, сиэдэрэй
Үөһээ Бүлүүм, үүнэ тур,
Үйэлэргэ туругур!
Үтүө-мааны ыччатыҥ
Үтүө ааккын үксэттин,
Үүнэн-сайдан, үөрэнэн,
Үрдэллэри дабайдын!
Евдокия Гаврильева хоһооно
-
1
-
0
-
0
-
0
-
0
-
0
