Төгүрүк остуолга Ил Түмэн бэрэссэдээтэлин солбуйааччы Антонина Григорьева, Ил Түмэн дьокутааттара, ситэрилээх былаас бэрэстэбиитэллэрэ, СӨ бырабыыталыстыбатын бэрэссэдээтэлин солбуйааччыта Сергей Местников, үөрэх уонна наука миниистирин солбуйааччыта Владимир Тихонов, Дьокуускай куорат дьаһалтатын үөрэххэ управлениетын салайааччыта Алексей Семенов, Дьокуускай куорат, Ньурба, Бүлүү, Үөһээ Бүлүү, Таатта, Нерюнгри дьаһалтатын, үөрэҕин управлениетын үлэһиттэрэ, оскуолаларын учууталлара, уопсастыбынньыктара, «Айар» кинигэ кыһата уонна да атын ийэ тыл дьылҕатын туһугар долгуйар дьон кытыннылар.
Кыттааччылар үгүс кыһалҕалаах боппуруоһу туруордулар. Төрүт тыл сокуон быһыытынан көмүскэлин, тылы сайыннарыыга туһуламмыт тэрээһиннэр, уһуйааннарга, оскуолаларга оҕолору иитии хайысхатынан туох итэҕэстэр баалларын, аныгы үйэҕэ сыыппара технологията өтөн киириитигэр ийэ тылбыт симэлийэн хаалбатын туһугар хайдах дьаһаныллыахтааҕын, Өрөспүүбүлүкэбит 100 сааһын көрсө улуу дьоммутун үйэтитии уонна да атын өрүттэри таарыйар ыйытыыларга хоруй көрдөөтүлэр.
Ол курдук, Сергей Местников эппитинэн, «2020-2024 сс. Саха өрөспүүбүлүкэтин судаарыстыбаннай уонна официальнай тылларын харыстааһын уонна сайыннарыы» бырагыраамаҕа быйыл 56 мөл. солк. көрүллүбүт.
Саха өрөспүүбүлүкэтин парламенын бэрэссэдээтэлин солбуйааччы Антонина Григорьева ийэ тыл статуһун үрдэтии бары эйгэ ытык иэһинэн буоларын ыйан туран, үлэ тыл туһунан өрөспүүбүлүкэ сокуонугар, концепциятыгар олоҕуран ыытылларын бэлиэтээтэ. Кини өрөспүүбүлүкэ норуоттарын төрүт тылын харыстааһыныгар, сайыннарыытыгар ханнык кыһалҕалаах боппуруостар баалларын ырытар билигин саамай тоҕоостоох кэм буоларын туһунан эттэ. «Тоҕоостоох кэм, тоҕо дьиэтэххэ, Өрөспүүбүлүкэбит Төрүт сокуонугар уларытыы киллэриллэр, чопчуланар кэмэ. Төрүт сокуоммутунан ийэ тыллбыт харыстаныахтаах», -- диэн эттэ.
Үөрэх миниистирин солбуйааччы Владимир Тихонов «Эркээни эргиирэ» оҕону араас хайысханан сайыннарыыга, ол иһигэр төрөөбүт тылыгар, култууратыгар уһуйууга туһуламмыт бырагыраама ис хоһоонун билиһиннэрдэ.
Таатта баһылыгын солбуйааччыта Изабелла Сивцева аныгы гаджет диэн аныгылыы сэп өтөн киирэр кэмигэр оҕолорбутун хайдах сахалыы тыыҥҥа уһуйабыт диэн ыйытыы туруорда. Тааттаҕа төрүт тылга анаммыт тэрээһин ыытылларын туһунан кэпсээтэ.
Чурапчы улууһун борокуруора Иван Ядреев тылы харыстааһын, сайыннарыы үлэтин сокуонунан хайдах буолуохтааҕын быһаарда. Кини туруорбут биир кыһалҕатынан – оҕолор таһырдьа тахсаат нууччалыы тылынан маҕаһыын, суол, ыйынньык аатттарын, рекламаны көрө сылдьан сахалыы толкуйдарын сүтэрэллэр диир.
Төгүрүк остуолга мантан да атын боппуруостарын олус интэриэһинэй кэпсэтии таҕыста. Толору ыстатыйаны «Ил Түмэн» кэлэр нүөмэригэр ааҕаарыҥ.
-
0
-
0
-
0
-
0
-
0
-
0
