Уопсастыба

Кэлэр 2022 сылга куорат бүддьүөтэ 9,097 млрд. солк., ол иһигэр 8,6 млрд. солк. араас нолуоктартан уонна хомуурдартан киллэриллэр дохуот, буолар. Бүддьүөт ороскуота 9,3 млрд., дэпэсиитэ 272 мөл. солк. буолара барылланар. Онуоха бүддьүөккэ нолуоктартан уонна хомуурдартан киллэриллэр үп кээмэйэ улаатан иһэрэ бэлиэтэммит.

Тус сыаллаах 17 муниципальнай уонна 5 биэдэмистибэннэй бырагыраамаларынан ыытыллар үлэҕэ-хамнаска 7,8 млрд. солк. көрүллүбүт, ити сыллааҕы бүддьүөт ороскуотун 83 %-а.

Бырагыраамалары таһынан ороскуоттарга 1,5 млрд. солк көрүллүбүт. Үбүлээһиҥҥэ сайдыы национальнай бырайыактара итиэннэ социальнай эбэһээтэлистибэлэри толоруу урутатан туруоруллубуттар.

«Прометейга» саҥа оскуола

Кэлэр сылга куорат араас микрооройуоннарыгар түөрт оҕо саада уонна «Прометей» микорооройуоҥҥа 990 оҕоҕо анаммыт саҥа оскуола үлэҕэ киллэриллиэҕэ. Хас даҕаны оскуолаҕа уонна оҕо лааҕырдарыгар хапытаалынанй өрөмүөн ыытыллара былааннанар, 38 №-дээх орто оскуолаҕа бөҕөргөтөр үлэ, аһылык блогун технологическай тэрилинэн хааччыйыы ыытыллыаҕа. Үөрэх тэрилтэлэригэр куттал суох буолуутун хааччыйан, видеокэтээн көрөр, харабыл сигнализациялара, домофоннар саҥардыллыахтара.

Култуура тэрилтэлэриттэн В.Г.Белинскэй аатынан уонна 17 №-дээх «Березка» библиотекаларга өрөмүөн ыытыллыаҕа, ыһыахтыыр ытык сир («Үс Хатыҥ») кэккэ эбийиэктэрэ сөргүтүллүөхтэрэ.

Маны таһынан, маршрутнай оптуобустар пааркалара саҥардыллыаҕа. Тырааныспар министиэристибэтин «Саха АССР 100 сылынан – 100 оптуобус» бырайыагынан, лизиҥҥэ 55 оптуобуһу атыылаһарга анаан «ЯПАК» муниципальнай-унитарнай тэрилтэҕэ 79,7 мөл. солк. көрүллүөҕэ.

Сергей Черных: «ОДЬКХ үбүлээһинэ татым»

Бүддьүөт уонна экэниэмикэ сис кэмитиэтин бэрэссэдээтэлэ Сергей Черных социальнай эйгэҕэ урутатан турар соруктарга болҕомто ууруллара тутаҕын эттэ.

-- ОДьКХ-ҕа үбүлээһин кыра буолан, элбэх оҕолоох ыалларга бэриллибит учаастактарга благоустройство оҥоруута кыайтарбат, ону иккис ааҕыыга хайаан да учуоттуур наада, – диэтэ кини.

«Дьокуускай аптекалара» приватизацияланар дуо?

Бүддьүөтү таһынан дьокутааттар үгүс боппуруоуһу көрдүлэр. Олортон биирдэстэрэ «Дьокуускай аптекалара» («Аптеки Якутска») муниципальнай-унитарнай тэрилтэни приватизациялааһын туһунан буолла. Дорубуйа харыстабылын эйгэтиттэн дьокутааттар Саргылаана Васильева уонна Николай Васильев бу бэйэтэ эми оҥорор, социальнай хайысхалаах соҕотох аптека буоларын бэлиэтээн тураннар, 2025 сылга диэри бириэмэ баарынан, тиэтэйбэккэ сүбэлээтилэр. Онуоха куорат баһылыгын солбуйааччы Георгий Гаврильев тэрилтэ син биир куоракка хааларын, киэбэ уларыйан, аахсыйаламыт уопсастыба буоларын быһаарда.

Куорат Дууматын бэрэссэдээтэлин солбуйааччы Анатолий Кырджагасов «Водоканал» эмиэ МУТ-тан аахсыйаламыт уопсастыбаҕа уларытыллан тэриллиэҕиттэн атаҕар бигэтик турбутун, барыска тахсыбытын этэ. Түмүккэ, дьокутааттар үгүстэрэ аптеканы приватизациялыырга куоластаатылар.