Доруобуйа харыстабылын министиэристибэтин тутаах үлэһиттэрэ -- миниистир солбуйааччыта Любовь Степановна Бурнашева, сүрүн эпидемиолог быраас Данилова Марианна Андреевна, сүрүн терапевт Павлова Маргарита Константиновна, сүрүн штат таһынан пульмонолог Аргунова Аграфена Николаевна – кыттыына ыллылар.
Вакцинацияламмыттар чэпчэкитик аһардаллар
Любовь Степановна иһитиннэрбитинэн, омикроҥҥа сутуллуу өрөспүүбүлүкэҕэ аччаабыта көстөр. Чуолаан Дьокуускайга аҕыйаабыт. Бүгүн тыһыынчаттан тахса киһи ыалдьыбыта бэлиэтэммит. Ол оннугар улуустарга ыалдьааччы ахсаана эбиллэр.
Бүгүҥҥү күҥҥэ өрөспүүбүлүкэҕэ коронавируһу утары быһыыны 591 тыһыынча киһи, бу нэһилиэнньэ улахан дьонун 82%-на ылбыт. Ревакцинацияны уопсайа 139 тыһыынча киһи ааспыт, бу 58%-ҥа тэҥнэһэр. Өссө даҕаны 99 тыһыынча киһи ылыахтаах. 12 саастарыттан улахан оҕолорго быһыы саҕаланна. Маныаха вакцина маҥнайгы баартыйата өрөспүүбүлүкэҕэ кэлэн, улуустарынан тарҕаммыт. Ордук элбэх киһи Дьокуускай куораттан оҕолоругар быһыыны туруортардылар.
Ыалдьыбыттар үгүстэрэ ыарыыны чэпчэкитик аһардаллара – вакцинация дьайыыта. Маны этэн туран, Любовь Степановна олохтоохтору ыарыы утары быһыыны ыларга, ревакцинацияны ааһарга ыҥырда.
Оҕолорго быһыы туһунан
Хамсык утары “Спутник-М” вакцина чинчийиини ааһан, 12-18 саастаах оҕолорго туруоруллар буолла. “Спутник-М” биллэр “Гам-Ковид-Вак” вакцина биэс төгүл аччатыллыбыт көрүҥэ буолар. Икки компонент 21 хонук арыттаах туруоруллар.
Оттон алта саастарыттан оҕолорго быһыы билигин үөрэтиллэр.
Төһө даҕаны быһыы харыстыырын иһин, төрөппүттэр болҕомтолорун санитарнай өттүгэр уура сылдьыахтаахтарын санатта. Култуурунай-маассабай тэрээһиннэргэ, оонньотор-аралдьытар комплекстарга сырытыннарыыны кыалларынан хааччахтыыллара ордук. Маны тэҥэ илии суунары, мааска кэтэри умнубаппыт.
Быһыы эрэ харыстаар кыахтаах
Ыарыыттан хамсык утары быһыы уонна хааччахтааһыныы тутуһуу эрэ харыстыыр кыахтааҕын Марианна Андреевна өссө күүскэ тоһоҕолоон эттэ. «Араас сыстыганнаах ыарыылартан быһыы дьону-сэргэни элбэх ыарыыттан харыстаан кэллэ. Бүгүҥҥү күҥҥэ бу көдьүүстээҕин уонна киһи доруобуйатын харыстыырын дакаастаата. Коронавирус хамсыга туруоҕуттан научнай тэрилтэлэр күүстээх үлэни саҕалаабыттара уонна быһыы саамай көдьүүстээҕин дакаастаатылар. Онон алта ый анараа өттүгэр быһыы ылбыттарга, ыалдьыбыттарга вакцинация уонна ревакцинация ирдэнэрин, бэйэҕит доруобуйаҕытын харыстыырга ыҥырабын”, -- диэтэ.
Каадырынан хааччыллыы боппуруоһа
Биир сытыы боппуруоһунан быраастар миэстэлэригэр тиийбэттэрэ буолла. Холобур, 56 тыһыынча нэһилиэнньэлээх Нерюнгрига уонча эрэ терапевт быраас баар. Невролог, реанимотолог, суһал көмө быраастара тиийбэттэр. Маныаха туох үлэ барарын уонна былаан торумнанарын ыйыталастылар.
Эппиэт толору буолла. Ол курдук, билигин үлэлиир араас бырагыраамалар туруоруллубут сыалы толуйбаттар. Маҥнайгы сылларга ыраах улуус балыыһаларыгар баҕалаахтар элбэх эбит буоллахтарына, билигин оннук буолбатах. Быраас идэлээх ыччат куоракка, үрдүк технологиялаах балыыһаларга, үлэлии хаала сатыыра бэлиэтэнэр. Онон Ил Түмэни кытары Доруобуйа харыстабылын министиэристибэтэ былааннаах үлэни ыытан, атын социальнай хайысхалаах суоллары тобулаллар. Холобур, Аартыкаҕа үлэлиир быраастар биэнсийэҕэ тахсыылара, ыстаастара атыннык ааҕылларын толкуйдууллар. Маны тэҥэ бырамыысыланнай улуустарга быраастар тиийбэттэрэ эмиэ сытыы боппуруос буолар. Баһылыгы кытары соторутааҕыта кэпсэтии баран, тыбыгастаах суоллары тобулаллар.
Маныаха оскуола оҕолоругар профориентациялаах үлэни күүһүрдэргэ этии киирдэ. Ол курдук, сорох улуустарга мэдиссиинэ кылаастара арыллан, баҕалаах оҕолору дьарыктыыллар эбит. Оннук Уус Маайаҕа 15-20 оҕону үөрэтэ сылдьаллар. Балартан доруобуйа харыстабылын салаатыгар үөрэнэ киириэхтэрэ диэн эрэллэрэ улахан.
Тус сыаллаах миэстэнэн үөрэххэ киллэриини Доруобуйа харыстабылын министиэристибэтэ өйүүр. Баҕалаах оҕолор киирбэттэрэ хомотор. Сорох түгэннэргэ маннык бүддьүөт харчытыгар үөрэммиттэр улуустарыгар барартан аккаастаналлар. Онуоха эмиэ төрөппүттэри, оҕолору кытары үлэ күүһүрүөхтээҕэ тоһоҕолонон этилиннэ.
Эмчиттэри үөрэтиигэ уларыйыылар киириэхтэрэ
Ааспыт үс сыл устата инфекционнай ыарыыларга болҕомто күүһүрдэ. Онон мэдиссиинискэй үөрэх бырагыраамаларыгар уларыйыылар киирэллэрэ уолдьаспыт. Коронавирус тарҕаныаҕыттан профилактиканы, эмтээһини терапевтарга уонна педиатрдарга күүһүрдүбүттэр.
Маны тэҥэ “кыһыл зонаҕа” үлэлиир быраастар, орто сүһүөх персонал тиһигин быспакка куурустары ааһар.
Экспресс-тестэри аптекалартан атыылаһыҥ
Нэһилиэнньэ бэйэтин туругун бэрэбиэркэлээн, экспрес-тестэри дьиэтигэр оҥостор кыахтанна.
Ол эрээри кэлин араас социальнай ситимнэринэн маннык тестэри атыылыыр буолбуттара долгутар. Маныаха сүбэ быһыытынан, экспресс-тестэри аптекалартан эрэ атыылаһарга эттилэр. Ол курдук, син биир мэдиссиинэ табаара буоларынан, харайыллар туспа усулуобуйата тутуһуллуохтаах, болдьоҕо хонтуруолланыхтаах. Оттон социальнай ситимнэринэн сэртипикээтэ даҕаны суох албын тестэри атыылаан, дьону буккуурга киллэриэхтэрин сөп.
Галина МАТВЕЕВА.
-
0
-
0
-
0
-
0
-
0
-
0
