Үлэ быраабылатын бигэргэтэр дойду бырабыыталыстыбатын уурааҕын барыла бу сыл олунньу 17 күнүгэр нуормалыыр-быраап аахталар бырайыактарын порталыгар таҕыста. Испииһэккэ кимнээх түбэһэллэрий, туохха нааданый?
Этиллибитин курдук, федеральнай регистр быраабылатын бигэргэтэр бырабыыталыстыба уурааҕын барыла олунньу 17 күнүгэр нуормалыыр-быраап аахталар бырайыактарын порталыгар таҕыста. Докумуону дьүүллэһии кулун тутар 14 күнүгэр диэри ыытыллыаҕа. Уураах барыла ылылыннаҕына, бу сыл балаҕан ыйын 1 күнүттэн олоххо киирэн, алта сыл устата үлэлиэҕэ.
«Сыстыганнаах ыарыылар» (инфекционнай) федеральнай регистрын ыытыы быраабылатын РФ Доруобуйаҕа министиэристибэтэ бэлэмнээбитэ уонна ааспыт сыл ахсынньытыгар таһаарбыта. Докумуоҥҥа этиллибитинэн, регистиргэ дойду үрдүнэн сыстыганнах ыарыыга сутуллубут дьон информациятын түмүөхтэрэ. Биэдэмистибиэ чуолкайдыырынан, бу испииһэк суһал көмөнү оҥорорго, мэдиссиинэ көмөтүн ыстандаартын уонна клиническэй мэктиэлэри туһанарга ананар.
- Мин санаабар, маннык регистрациялааһын «санитарнай щит» федеральнай бьрагырааманан ааһыы олоххо киллэриитин биир хайысхатынан ааҕыахха сөп, — диир дойду үтүөлээх бырааһа, Госдума дьокутаата Татьяна Кусайко, — Маннык инфекционнай ыарыылар түбэлтэлэрин испииһэктиир сыстыганнаах ыарыылар түбэлтэлэрин арыйыыга, биһиги дойдубутугар инфекциялары тарҕатар, сэрэтэр дьаһаллары ылынарга көмөлүөҕэ.
Ону сэргэ дьокутаат ыарыһахтары эминэн хааччыйыы хаачыстыбатын үрдэтэр кыаҕы үөскэтэрин, ону тэҥэ мэдиссиинэ ыйынньыктарын тутуһууну, көмө ыстандаартын көдьүүстээхтик хонтуруоллуур таһымын үрдэтэр туһунан эттэ.
Регистры РФ Доруобуйа харыстабылын министиэристибэтэ толоруоҕа, оттон киниэхэ — мэдиссиинэ бары тэрилтэлэрэ, федеральнай нолуок сулууспата, ИДьМ, Роспотребнадзор, ФОМС, пенсионнай уонна социальнай страховкалааһын пуондата 282 көрүҥтэн турар араас сыстыганнаах ыарыылар иһитиннэриилэрин ыытыахтара. Кинилэр ортолоругар лямблиоз, дифтерия, скарлатина, корь, энцефалит, грипп уонна ковид-19, холера, тиф, ботулизм, сэллик, ветряная оспа, коклюш, хроническай гепатиттар, о.д.а. киирэллэр.
Инфекционнай ыарыһахтар тустарынан суһаллык иһитиннэриилэри таһынан, регистр көмөтүнэн ыарыһахтар маршруттарын тэрийэр, туспа нозологияларга испииһэктээһини уонна вакцинацияны олохтуур былааннаахтар. Докумуоҥҥа информацияны киллэрии болдьоҕо ыйылынна. Ол курдук, холобур, лабораторнай чинчийиилэр түмүктэрин икки чаас иһигэр биэриэхтэрэ.
-
0
-
0
-
0
-
0
-
0
-
0
