Биллэрии

Бастатан туран, 7-гэр диэри саастаах төрөппүттэргэ “больничнайдара” 100 % төлөнөр буолла. Бу нуорма 2021 сыл балаҕан ыйын 1 күнүттэн үлэлиэҕэ.

Билиҥҥи быраабыланан, өскөтүн киһи үлэтин ыстааһа 6 ыйтан кыра буоллаҕына, хамнас алын төлөбүрүн эрэ ылар бырааптаах. 6 ыйтан 5 сылга диэри буоллаҕына, хамнаһын 60 %-нын төлүүллэр. 5 сылтан 8 сылга диэри ыстаастаахтарга – 80 %-на ананар. 8 сылтан үөһэ ыстаастаах эрэ үлэһит хамнаһын бүтүннүү ылар кыахтаах. Саҥа быраабыланан, оскуола иннинээҕи саастаах уонна кыра ыстаастаах төрөппүттэр “больничнайга” барар түгэннэригэр, кинилэргэ хамнастарын 100 %-нын төлүөхтэрэ.

Иккиһинэн, оҕо күүтэ сылдьар дьахталлар кэмигэр учуокка турдахтарына уонна олох ыарахан балаһыанньатыгар түбэспит буоллахтарына, ый аайы анал төлөбүр ылыахтара. Маныаха бу төлөбүрү эрэгийиэҥҥэ тиийинэн олоруу алын кээмэйиттэн кыра дохуоттаах дьахталларга аныахтара. 2021 сыл от ыйын 1 күнүттэн маннык босуобуйа кээмэйэ 6350 солк. тэҥнэһиэҕэ. Эспиэрдэр этэллэринэн, бу көмөнөн дойду үрдүнэн 630 тыһыынча кэриҥэ дьахтар туһаныаҕа.

Үсүһүнэн, 8-тан 16-гар диэри саастаах оҕолоох аҥаардас төрөппүттэргэ, өскөтүн кинилэр орто дохуоттара эрэгийиэҥҥэ тиийинэн олоруу алын кээмэйиттэн кыра буоллаҕына, тустаах ыйдааҕы босуобуйа ананыаҕа. Бу босуобуйа ортотунан 5360 солк. буолуоҕа.  

Ил Түмэн дьиэ кэргэн уонна оҕо аймах дьыалаларыгар сис кэмитиэтин бэрэссэдээтэлэ, “Биир ньыгыл Арассыыйа” баартыйа “Бигэ дьиэ кэргэн” бырайыагын сүрүннээччи Алена Атласова саҥа социальнай өйөбүллэри субу курдук быһаарда:

– Судаарыстыба бэлиитикэтин үрдүкү приоритетынан – норуоту харыстааһын буолла. РФ Бэрэсидьиэнэ дойдуга төрөөһүн мөлтөҕүн туһунан элбэхтик бэлиэтээн турар. Онон, ити хайысхаҕа сөптөөх үлэлэр салгыы барыахтарын наада.

Мин бэйэм үлэбинэн элбэх аҥаардас ийэни кытта алтыһабын. Онон, от ыйын 1 күнүттэн 8-тан 16-гар диэри саастаах оҕолоох төрөппүттэри өйүүллэрэ олус наадалаах. Билиҥҥитэ социальнай чэпчэтиилэр үксүлэрэ толору эрэ дьиэ кэргэҥҥэ ананаллар. 

Доруобай уонна чөл туруктаах оҕо төрүүрүгэр ийэлэргэ харчынан көмө наада. Онон итинник миэрэ олоххо киирэр буолла. Ол курдук, оҕо күүтэр сылдьар ийэ учуокка кэмигэр турдаҕына уонна олох ыарахан балаһыанньатыгар түбэспит буоллаҕына, киниэхэ ыйдааҕы босуобуйа ананыаҕа. Бу босуобуйа кээмэйэ 6350 солк. буолуоҕа.

“Больничнайга” сыһыаннаах көннөрүүгэ туспа тохтуохпун баҕарабын. Бу эдэр ыалларга олус наадалаах көмөлтө дии саныыбын. Холобур, эдэр ийэ саҥа үлэҕэ киирдэҕинэ, хамнаһын толору ылар кыаҕа суоҕа. Ол иһин оҕолорун кыһалҕаттан эбэлэргэ уонна эһэлэргэ хаалларара. Өскөтүн аҥаардас ийэ буоллаҕына, “больничнайга” бардаҕына, харчытыгар олус сүүйтэрэрэ. Онон РФ Бэрэсидьиэнин В. Путин көҕүлээһининэн, эдэр ийэлэргэ олус наадалаах көмөлтө оҥоһуллар буолла дии саныыбын, – диэн Алена Николаевна санаатын үллэһиннэ.

.