Бу биһиэхэ хас биирдиибитигэр, Саха Сирин бүттүүнүгэр бэлиэ күн. Отут сыл аннараа өттүгэр икки балааталаах парламент тэриллиитэ Российскай Федерация састаабыгар өрөспүүбүлүкэ судаарыстыбаннаһын бөҕөргөтүүгэ биир сүрүн түһүмэх буолбута.
Республика Үрдүкү Сэбиэтин быһаарыытынан уонна Саха Сирин Бэрэсидьиэнин М.Е. Николаев Ыйааҕынан тэриллибит сокуону оҥорор саҥа үрдүкү уорган дириҥ историческай силистээх, норуот бэрэстэбиитэлистибэтин утумун уонна үгэстэрин тутуһар, салҕыыр.
Ил Түмэн Арассыыйа биир тутаах эрэгийиэнин - Саха Өрөспүүбүлүкэтин- инники сайдыытын хаамыытын быһаарар бэлитиичэскэй тиһигин сүрүн сорҕото буолар. Хас биирдии ыҥырыы дьокутааттара элбэх омук олорор өрөспүүбүлүкэтин олоҕун-дьаһаҕын уратыларын учуоттаан, быраап баазатын оҥорууга бэйэлэрин тугунан да сыаналаммат кылааттарын киллэрэллэр.
Арассыыйа парламентаризмын бөҕөргөтүүгэ саха парламенын социальнай эйгэҕэ, дьиэ кэргэн бэлиитикэтигэр, төрүт олохтоох хотугу норуоттары өйөөһүҥҥэ, экологияҕа итиэннэ Аартыка территорияларын сайыннарыыга көҕүлээһиннэрэ федеральнай сокуоннары оҥорууга тирэх буолбуттара.
Судаарыстыбаннай Мунньах (Ил Түмэн) - өрөспүүбүлүкэ бэлитиичэскэй уонна уопсастыбаннай олоҕун, олохтоох салайыныы бэрэстэбиитэллээх уорганнарын кытары бииргэ үлэлээһин эргийэр киинэ, быыбардааччылары, өрөспүүбүлүкэ олохтоохторун кытары быстыспат ситим тиһигэ.
Миэхэ, өрөспүүбүлүкэ баһылыгар, Саха Сирин олохтоохторун, Ийэ дойдубут интэриэстэрин туһугар ардыгар олус судургута суох быһаарыылары ылынарбар парламент тирэҕим буолар. Ити ордук билигин Ийэ дойдубут кырдьык иһин, көҥүл сайдыы уонна кэрэ кэскил иһин охсуһуутугар былаас бары салааларын итиэннэ бүттүүн норуот сомоҕолоһуулара кыайыыга суолтата олус улахан.
Биһиги уопсай үлэбит-хамнаспыт Арассыыйа Бэрэсидьиэнэ Владимир Путин дойдуну сайыннарыыга туруорар стратегическай соруктарын олоххо киллэрэргэ туһуланар. Онон өрөспүүбүлүкэ иннигэр экэниэмикэни өрө көтөҕүүгэ, киһи хапытаалын сайыннарыыга, нэһилиэнньэ олоҕун-дьаһаҕын тупсарыыга дьоһун соруктар тураллар. Олору быһаарарга Ил Түмэн дьайыыта-сабыдыала улахан, федеральнай таһымнаах сокуоннары оҥорорго кыттыыта көдьүүстээх буолуоҕа. Норуот дьокутааттарын куорпуһун уопута, идэтийбит таһыма уонна уопсай сорук тула бары түмсэрбит кэлэр да өттүгэр өрөспүүбүлүкэбит сайдарын туһугар парламент таһаарыылаах үлэтин мэктиэлиэҕэ.
Мин икки ыҥырыыга норуот дьокутаата этим, ол бэлиитик быһыытынан ситэрбэр-хоторбор, биир дойдулаахтарым иннилэригэр үрдүк эппиэтинэһи өйдүүрбэр уахан суолталаммыта. Миэхэ сомоҕолоһуу иэйиитин бөҕөргөппүттэрин, түмсүүлээх эрэ буоллахха туруоруллубут сорук ситиһиллэригэр, хайа баҕарар уустук боппуруос быһаарылларыгар эрэли үөскэппиттэрин иһин, дьокутааттаабыт кэммэр бииргэ үлэлээбит кэллиэгэлэрбэр истиҥник махтанабын. Мин санаабар парламентаризм ис дьиҥэ, суолтата итиннэ сытар.
Судаарыстыбаннай Мунньах (Ил Түмэн) кэлэр даҕаны өттүгэр гражданскай уопсастыба сирдьитэ, Саха Сирин олохтоохторун өйдөрүн-санааларын, көҕүлээһиннэрин тиэрдээччи буолуоҕа диэн эрэллээхпин.
Бүгүн, 2024 сыл маҥнайгы күнэ, Саха Өрөспүүбүлүкэтин Судаарыстыбаннай Мунньаҕа (Ил Түмэн) отут сыллаах кэрдиис кэмин түмүктүүр уонна инники сайдыытын торумнуур үрдүк суолталаах күн.
Бары кэллиэгэлэрбэр, дьокутааттарга, өрөспүүбүлүкэ сокуону оҥорор былааһын бэтэрээннэригэр ситиһиилэри, өрөспүүбүлүкэбит чэчирии сайдарын, нэһилиэнньэ олоҕо-дьаһаҕа бигэ туруктаах буоларын туһугар былааннаммыт соруктаргыт туолалларыгар баҕарабын!
Айсен Николаев,
Саха Өрөспүүбүлүкэтин Ил Дархана,
II уонна III ыҥырыылаах Ил Түмэн дьокутаата
-
0
-
0
-
0
-
0
-
0
-
0
