Быйылгы 2020 сыл Улуу Кыайыы үбүлүөйдээх сылынан буолар, бу бырааһынньык суолтата өссө улаатан иһэр. Билигин биһиги аттыбытыгар Аҕа дойду Улуу Сэриитин 67 кыттыылааҕа уонна инбэлиитэ, Аҕа дойду Улуу сэриитин 566 огдообото, 44858 тыыл бэтэрээнэ, «Ленинград былакаадатын олохтооҕо” анал бэлиэнэн наҕарааламмыт 25 киһи, оҕо эрдэхтэринэ концлааҕыр хаайыытыгар сылдьыбыт 17 киһи, 25 тыһ. сэрии оҕолоро, 130,2 тыһ. үлэ бэтэрээннэрэ бааллар. 2020 сылга Саха өрөспүүбүлүкэтигэр «Аҕа саастаах көлүөнэ» диэн бырайыагы олоххо киллэриигэ 537 мөл. солк. көрүллүбүтэ.
Тумус туттуллар соруктартан биирдэстэринэн аҕам саастаах дьону саамай наадалаах өҥөнөн уонна тэрээһиннэринэн хааччыйыы буолар. Аҕа көлүөнэ дьон олохторун усулуобуйата тупсарын туһугар биэнсийэ индексацияланар, дойду үрдүнэн биэнсийэ систиэмэтэ уларыйар, социальнай өттүнэн көрөр-истэр тэрилтэлэр ахсааннара элбиир, ветераннарга аналлаах дьиэлэр, аҕам саастаах дьоҥҥо, инбэлииттэргэ аналлаах интэринээт-дьиэлэр тутуллаллар, муниципальнай тэриллиилэргэ аадырыстаах көмөнү оҥорор саҥа бырагыраамалар олоххо киирэллэр.
Быйыл олунньу 27 күнүгэр «Аҕа дойду Улуу сэриитин оҕолоругар социальнай көмө миэрэлэрэ» диэн Саха өрөспүүбүлүкэтин сокуона ылыллыбыта. Ветераннары, биэнсийэлээхтэри сокуон өттүнэн өйүүргэ аналлаах үлэ салгыы ыытыллыаҕа.
Биһиги эһиги өр сылларга таһаарыылаах үлэҕитинэн, үрдүк култуураҕытынан, олоххо сырдыгы, үчүгэйи эрэ ыралыыргытынан киэн туттабыт. Эһиги быйылгы көмүс күһүҥҥүт сырдык, кэрэ буоллун. Эһигини өрүү чугас дьоҥҥут тапталлара, сылаастара угуттаатын, оҕолоргут, сиэннэргит барахсаттар ситиһиилэрэ мэлдьи үөрдэ турдун! Кытаанах доруобуйаны, уһун дьоллоох олоҕу баҕарабын!
Антонина Григорьева, Саха Өрөспүүбүлүкэтин Ил Түмэнин Бэрэссэдээтэлин солбуйааччы
-
0
-
0
-
0
-
0
-
0
-
0
