Үөрэхтээһин сыаннаһа, үөрэҕи сыаналааһын, хас биирдии киһи идэлээх маастырыстыбата сылтан сыл үрдүүрүгэр эһиги – учууталлар -- көмөҕүт, үлэҕэ дьулуургут төһүү күүһүнэн буоларыгар ис-сүрэхпиттэн итэҕэйэбин. Арассыыйа үөрэхтээһинэ аан дойду үрдүнэн үрдүктүк билиниллэр, сыаналанар. Биһиги РФ Бэрэсидьиэнэ Владимир Путин көҕүлээбит «Үөрэхтээһин» национальнай бырайыага дойду үрдүнэн төһө да экэнэмиичэскэй өттүнэн ыарахаттар баалларын үрдүнэн олоххо киирэрин туһугар түмсүүлээхтик үлэлиибит. Ити үлэ түмүгэр учууталлар уонна педагогтар айымньылаахтык үлэлиир усулуобуйалара, бигэ олохторо-дьаһахтара тэриллиэхтээх.
Быйыл саҥа үөрэх дьылыгар Дьокуускай куоракка аан дойду таһымнаах Аартыкатааҕы оскуола, Жатай бөһүөлэгэр «Точка роста» диэн сыыппара үөрэхтээһинин уонна гуманитарнай профиллаах киин үлэҕэ киирбиттэрэ бу улахан ситиһиибитинэн буолар. «Үөрэхтээһин» национальнай бырайыак иһинэн «Хас биирдии оҕо ситиһиитэ» диэн федеральнай бырайыак чэрчитинэн, «Юные Якутяне» өрөспүүбүлүкэтээҕи киин базатыгар олоҕуран, оҕолору естественнай-научнай эбии үөрэхтээһиҥҥэ аналлаах саҥа моделлаах Экостанция аһыллан үлэлээн эрэр.
Норуот дьокутааттара «СӨ үөрэҕин туһунан» сокуоҥҥа өрөспүүбүлүкэ судаарыстыбаннай уонна муниципальнай тэриллиилэр үөрэҕин кыһаларыгар алын сүһүөх үөрэх бырагырааматынан үөрэнэр оҕолору хаачыстыбалаах, итии аһынан хааччыйар туһунан уларытыыны киллэрэргэ сокуон бырайыагын оҥордулар. Итини тэҥэ, кэллиэгэлэрим федеральнай таһымҥа туруорсан, РФ «РФ Аартыкатааҕы түөлбэтин социальнай-экэнэмиичэскэй сайдыытын» бырагырааматыгар эбии «Аартыка оҕолоро» хос бырагырааманы киллэрэри ситистилэр.
Олох тэтимнээхтик сайдарын чэрчитинэн, үөрэхтээһиҥҥэ уонна үөрэтии хаачыстыбатын үрдэтиигэ инновация ньымаларын туһаныыны учууталлар күүскэ баһылыахтаахтара билиҥҥи тэтимнээхтик сайдар кэм ирдэбилэ буолла. РФ Бэрэсидьиэнэ Владимир Путин коронавирус дьаҥын усулуобуйатын кэмигэр РФ Судаарыстыбаннай Мунньаҕар «2021 сылга бары оскуолалар түргэн интэриниэтинэн толору хааччыллыахтаахтар. Бу — бары үөрэх кыһалара сыыппаранан үөрэҕи баһылыылларыгар-көһүлүүллэригэр төһүү күүһүнэн буолуоҕа уонна хас биирдии учуутал, үөрэнээччи үөрэххэ тумус туттуллар бырагыраамалары туһаналларыгар көмөлөһүөҕэ», — диэн этиитэ олус суолталаах.
Убаастабыллаах учууталлар! «Үөрэх баар – бараммат баай» диэн саха өһүн хоһооно баар. Саха киһитин менталитетыгар үөрэҕи баһылааһын үтүө олоххо дьулуһуутун кытта ыкса сибээстээх. Саха интэлигиэнсийэтин чулуу бэрэстэбиитэллэрэ Алексей Кулаковскай – Өксөкүлээх Өлөксөй, Платон Слепцов – Ойуунускай, Гаврил Ксенофонтов, уо.да.а. уопсастыбаннай-бэлитиичэскэй үлэлэринэн, туруорсууларынан бэйэлэрин норуоттарыгар үөрэх сайдар акылаатын уурбуттара. Эһиги быһаччы көхтөөх кыттыыгытынан өр сылларга үлэлээбит учууталлар уопуттара, көҕүлээһиннэрэ тарҕатыллалларын ааһан, кинилэр уопуттара үөрэх хаачыстыбатын саҥа таһымҥа таһаарарга төһүү күүһүнэн буолаллар.
Эһиэхэ чэгиэн-чэбдик доруобуйаны, бары үчүгэйи баҕарабын. Биһиги барыбыт кыахпытынан баар кыһалҕалары этэҥҥэ туруохпут диэн эрэнэбин. Айымньылаах үлэҕитигэр ситиһиилэри, саҥа үрдэллэри дабайан иһэргитигэр, этэҥҥэ буолууну баҕарабын!
Петр Гоголев, Саха Өрөспүүбүлүкэтин Ил Түмэнин Бэрэссэдээтэлэ
-
0
-
0
-
0
-
0
-
0
-
0
