-Ыал ийэтинэн диэн бэргэн этии саха үлэһит, сэмэй ыалыгар быһаччы сыһыаннаах дии саныыбын.
1993 сылтан Ийэ күнэ бэлиэтэнэрэ үгэскэ кубулуйбута сиэрдээх. Күннээҕи түбүктэн быыс булан күн сирин көрдөрбүт, олус чугас киһибитигэр ийэбитигэр таптал, махтал тылларын этэр арыт кыаллыбат. Онон Ийэҕэ анаммыт күн баара олус үчүгэй. Мин ийэм Ольга Петровна 1930 сыллаахха Лээгигэ Мундуруччу үрэҕин төрдүгэр төрөөбүтэ. Аҕата, эһэм Максимов Петр Давыдович, аатырбыт булчут, тыллаах-өстөөх, Лээги нэһилиэгин биир бас-көс киһитэ эбит. Сэбиэскэй былааска сир үллэhигэр дьокутаатынан талыллан улуус киинигэр Абаҕаҕа мунньахтыы киирээри сылдьан тымныйан, ыалдьан, орто сааhыгар өлбүт. Ийэтэ, эбэм, Ольга Петровна 7 оҕотун бэйэтэ атахтарыгар туруорбута. Ийэм убайдара сэриигэ бараннар, ийэтигэр көмөлөһөөрү, баара-суоҕа 12 сааhыттан Калинин аатынан холкуос үлэһитэ буолан, Лээгигэ Дьорохойдоох, Уккаан, Чараҥ, Сохсолоох, Мундуруччу учаастактарынан сүөһү көрбүтэ, ыанньыксыттаабыта. Холкуостар бөдөҥсүйүүлэригэр Төгүлтэ бөһүөлэгэр көһөн киирэн, кырымахтаах хара саhылы иитиигэ үрдүк көрдөрүүнү ситиһэн 1954 сыллаахха Москваҕа ВДНХ-ҕа кыттар чиэскэ тиксибитэ, мэтээлинэн наҕараадаламмыта.
Оччолорго кини 24 саастаах этэ. Ийэм бочуоттаах сынньалаҥҥа тахсыар диэри оскуолаҕа, оҕо уһуйааныгар,маҕаһыыҥҥа, "Амма" сопхуоска араас үлэлэргэ үтүө суобастаахтык үлэлээбитэ. Кини дьоҥҥо барытыгар эриэ-дэхси истиҥ сыһыаннааҕа, үтүө майгылааҕа. Ийэм киирбит ыалдьыты үөрэ-көтө көрсөр, суоҕунан- баарынан күндүлүүр мааны хаһаайка буоларын үөлээннээхтэрэ куруук ахталлар. Биһигини, оҕолорун, ылсыбыт дьыалабытын тиһэҕэр тиэрдэргэ, үлэҕэ сыстаҕас, дьоҥҥо элэккэй сыһыаннаах буоларга үөрэппитэ...
Күндү ийэлэр, алаһа дьиэ араҥаччылара кэнчээри ыччаккыт кэскилэ кэҥээтин, ыра санааҕыт олоххо киирдиҥ, Эһиги буолаҕыт сырдыгы, кэрэни үксэтээччилэр, үрүҥ күн сыламын курдук мэлдьи сылааһынан, тапталынан сыдьаайар тапталлаах ийэлэрбит! Дьол суһума сэттэ кустук өҥүнүү олоххутун киэргэттин! Чэгиэн буолуҥ, куруук тапталгытынан араҥаччылыыргытыгар барҕа махтал!
-
0
-
0
-
0
-
0
-
0
-
0
