Ытыктабыллаах Анна Николаевна!
Эйиигин күн сирин көрбүтүҥ 100 сыла туолар бэлиэ күҥҥүнэн истиҥник эҕэрдэлиибин. Эн киһи-аймах уһун үйэлээхтэрин кэккэтигэр холкутук, дьоһуннук туттан киирдиҥ. Уһун үйэлээх аатын мүччү тутуох буолбут сахаҥ дьонун аатын өрө көтөхтүҥ, Аар саарга иһитиннэрдиҥ. Бар-дьоҥҥор, ыччакка үрдүк эркээйи оҕустуҥ, чөл, уһун, соргулаах олоххо ыҥырдыҥ.
Күндү Анна Николаевна. Эн төрөөбүт сахаҥ норуотун XX үйэтинээҕи историятын тыыннаах кэрэһитэҕин. Күн бүгүнүгэр диэри олоҕу ситимниир, өйү-санааны дьэҥкэрдэр, тупсарар Сээркээн сэһэҥҥин. Убайыҥ, Саха сирин үөрэҕин наркома Иван Николаевич Жирков, кини доҕотторо Платон Ойуунускай, Анемподист Софронов, Николай Неустроев кэмнэрин, Саха сиригэр Сэбиэскэй тутул маҥнайгы сылларын, бастакы колхозтары, үөрэх, култуура сайдыытын, сэрии иннинээҕи ураты кэмнэри өйдүүгүн. Аҕа дойдуну көмүскүүр Улуу сэрии ыарахаттарын, аас-туор кэмнэрин ааспытыҥ, Кыайыы өрөгөйүн билбитиҥ. Төрөөбүт Дүпсүнүҥ, Сахаҥ Сирэ, ыччат дьон сайдыылаах буоларын туһугар уонунан сылларга эҥкилэ суох үлэлээбитиҥ. Саха Өрөспүүбүлүкэтин Аар кырдьаҕас учууталаҕын. Эн ааккын бастакы үөрэнээччилэриҥ, кинилэр оҕолоро, кинилэр оҕолорун оҕолоро, сиэннэрэ, хос сиэннэрэ махтана, сөҕө, ытыктыы ааттыыллар.
Ытыктабыллаах Анна Николаевна!
Эйиэхэ үтүө туругу, дьон-сэргэ ытыктабылын, аны да уһун, эркээйилээх олоҕу баҕарабын.
Кытаат, олоххо тардыһар дьоҕургун, күүскүн ыһыктыма, тохтоомо, бүгүҥҥүтээҕэр үрдүк үрдэлгэ дабай, үрүҥ күн анныгар уһун олоххо бар дьоҥҥун ыҥыр, угуй, көҕүлээ.
Александр Жирков. Ил Түмэн.
Ил Түмэн пресс-сулууспата
Архыып хаартыскалара
-
0
-
0
-
0
-
0
-
0
-
0
