Күндү биир идэлээхпит Валерий Николаевич, олоҕуҥ бэлиэ кэрдиис кэминэн эҕэрдэлиибит! Эн саха кинигэтин кыһата эриирдээх-мускуурдаах кэмнэр бары тургутууларын этэҥҥэ туораан, атаҕар бигэтик турарыгар итиэннэ хамнастаах үлэҥ таһынан уопсастыбанньык быһыытынан эдэр эрдэххиттэн төрөөбүт-үөскээбит Сахаҥ сирэ саҥа олох суолугар үктэнэн силигилии сайдарыгар туох баар билиигин-көрүүгүн, өйгүн-санааҕын ууран туран, сыраҕын биэрбит үтүөҕүн үрдүктүк сыаналыыбыт. Саха Өрөспүүбүлүкэтин судаарыстыбаннаһын туһугар турууласпыт Максим Аммосов, Платон Ойуунускай, Исидор Барахов сырдык ааттарын үйэтитиини, Өрөспүүбүлүкэ күнүн төрүттээһини, “Эдэр интэлигиэнсийэ” түмсүүнү тэрийиини эн биир бастакынан көҕүлээбиккин, олоххо киллэрсибиккин умнубаппыт. М.К.Аммосовынан сирэйдээн Казахстан, Кыргызстан судаарыстыбаларын кытта быстыбат ситими олохтостуҥ, аймахтыы түүр норуоттарын уонна нуучча биллиилээх суруйааччыларын сахалыы саҥартыҥ. Эн илииҥ иһинэн саха киэн туттар, таптыыр суруйааччыларын Далан “Тыгын Дархан”, Николай Лугинов “Чыҥыс Хаан ыйааҕынан”, Ойуку “Хоболоох суол”, Николай Петров “Ол үйэлэр дуорааннара”, Николай Уус “Быһылааннаах былыргыга”, Тумарча “Биһиги Аан Дархаммыт”, о.д.а. саха норуотун олоҕун кэрдиис кэмнэрин арыйар-сырдатар сүдү айымньылар чочуллан-оҥоһуллан кинигэ буолан тахсыбыттара.
Ытыктабыллаах Валерий Николаевич, сааһырдым диэн самныбакка, мындыр-сылык сааскар үктэммит киһи сиэринэн өссө дириҥ хорутуулаахтык айаргар-тутаргар, туппуккун ыһыктыбакка, уһуннук үлэлииргэр, үгэскинэн төрөөбүт дойдуҥ, дьонуҥ-сэргэҥ туһугар түбүгүрэн сүүрэ-көтө сылдьаргар, мэлдьи чэгиэн-чэбдик буоларгар, дьол доҕуһуоллаах, үөрүү аргыстаах дьоһун олоҕу баҕарабыт!
“Ил Түмэн” издательскай дьиэ салалтата уонна кэлэктиибэ.
-
0
-
0
-
0
-
0
-
0
-
0
