Күндү доҕоттор!
Эһигини Саха Өрөспүүбүлүкэтин Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэт уонна тус бэйэм ааппытттан Саха Сирин Булчуттарын күннэринэн итиитик- истиҥник эҕэрдэлиибин!
Булт барахсан ураты абылаҥнаах. Булту сатабылгынан уонна тулуургунан баһыйдаххына эрэ кыайаҕын. Булт – Байанай бэлэҕэ. Байанай эһэкээбит мээнэ киһиэхэ утары ууммат майгылааҕын бары билэбит, санаатын таптахпытына эрэ табыллан бултуохпутун собун. Хайа баҕарар эр киһини булт диэн өйдөбул киэргэтэр, кинини өй-санаа өттүттэн сайдарга, булугас, мындыр бигэ тирэхтээх буоларыгар иитэр. Эт-сиин сайдыытын нэгирдээх, тулуурдаах, эр санаалаах киһи буоларга айылҕабыт үөрэтэр уонна иитэр. Бу өйдөбул биһиги сахабыт норуотугар сиэри- майгыны, эти-хааны сайыннарыыга ураты культурабыт буолар.
Эр киһи сыл баһыгар-атаҕар айылҕалыын алтыһан, сиргэ - уокка сылдьан, дууһалыын сынньаныахтаах, ол иһин булчуттар, төһө да ороскуоттааҕын иһин, тэринэн- бэринэн тыаларын диэки барбыттара эрэ баар буолар.
Саха киһитэ былыр-былыргыттан айылҕаны кытта ыкса сибээстээх буолан айылҕаҕа сиэри-туому тутуһан сылдьыахтаах, харыстабыллаахтык айылҕаҕа уонна онно олорооччуларга сыһыаннаһыахтаах. Сиэри - туому тутуһан сырыттаҕына эрэ, олоҕо-дьаһаҕа бигэ туруктаах буолар. Бултаабыт булдун ыспакка - тохпокко, буортулаабакка астаан-үөллээн туһаныахтаах.
Биьиги бары өйдүөх тустаахпыт – айылҕабыт хайдах туруктааҕын кэлэр көлүөнэҕэ хаалара биһигиттэн тутулуктааҕын. Инникини санаан, Байанай баайын сөптөөхтүк сиэрдээхтик сыһыаннастахпытына эрэ инники кэнэҕэски кэлэр көлүөнэ айылҕа кэрэтин сүүрэрин-көтөрүн көрүө билиэ турдаҕа.
Баҕарыам этэ барыгытыгар Баай Байанайбыт өрүү күндүлүү турдун. Дьиэ кэргэн аҕа баһылыга буоларгыт быһыытынан, өттүк харалаах, кэргэҥҥит, оҕолоргут-урууларгыт, чугас дьоҥҥут эһиги Байанайгыт бэлэҕиттэн амсайаннар, куруук чэгиэн-чэбдик буоллуннар, күүстэригэр – күүс эбиллэн, сүргэлэрэ көтөҕүллэн сырыттыннар! Дьоллоох-соргулаах, бигэ туруктаах сылдьаргытыгар баҕарабын! Булт тула өйдуун-санаалыын сынньанан, түмсэн, сомоҕолоһон, өрүү үтүө үктэллээх сылдьыҥ! Барыгытыгар кытаанах доруобуйаны, чөл туруктаах олоҕу! Байанайгыт тосхойдун!
Саха Өрөспүүбүлүкэтин Ил Түмэн Судаарыстыбаннай Мунньаҕын Сир сыһыаннаһыыларыгар, айылҕа ресурсаларыгар уонна экологияҕа сис кэмитиэт бэрэссэдээтэлэ В.М. Прокопьев.
-
0
-
0
-
0
-
0
-
0
-
0
