Ытыктабыллаах Мария Николаевна! Эйигин төрөөбүт күҥҥүнэн эҕэрдэлээн туран, салайар-айар үлэҕин, дьон-сэргэ туһугар ахсаабат кыһамньыгын, олох таһымын үрдэтэр соруктаах түбүккүн, саха омук сайдарын туһугар туруулаһыыларгын уонна ситиһиилэргин хоһоонунан хоһуйан, сахалыы эрэдээксийэҥ эҕэрдэлээтэҕин буолуохтун!
Сахалыы тыллаах хаһыат
Саҥалыы тыыны ыларыгар,
Саҥа таһымҥа тахсарыгар,
Сайдар-тэнийэр тускулугар
Соһуччу Эн кэлбитиҥ --
Сулус курдук чаҕылыйан,
Сырдыгынан сыдьаайан,
Суруналыыстыка эйгэтин
Суһумнуу сандаардан.
Сатабыллаах, дьоһуннаах
Салайааччы бэрдэ буолаҥҥын,
“Ситим медиа” айар бөлөҕү
Сүрүннээҥҥин тэрийбитиҥ.
Сурунаал, хаһыат эгэлгэтин
Сылтан сыл ахсын тэнитэн,
Сахаҥ сирин олохтоохторугар
Сонун бэлэх оҥорбутуҥ.
Сах саҕаттан үөскээбит,
Сап саҕаттан салҕаммыт,
Саха омук барахсан
Соргулаах уран тыла
Сүүрбэ биирис үйэҕэ
Симэлийбэккэ, сүппэккэ,
Салгыы сайдар дьылҕатын
Сурукка-бичиккэ түстээҥҥин,
Сурунаалга, хаһыакка тистэрэҥҥин,
Саргылардаах кэлэр кэмҥэ
Сууруллубат-сотуллубат
Сүдү өҥөнү оҥордуҥ.
Саха сирин кэскилин туһугар
Салгыбакка туруулаһаҥҥын,
Сүҥкэн үлэни ыытаҥҥын,
Сэҥээриини ылаҥҥын,
Салгыы өссө туһалаатын диэн,
Сокуонунан көмүскээтин диэн,
Сайдам дьонуҥ-сэргэҥ эйигин
Судаарыстыбаннай Мунньахха,
Сөптөөх киһини дьокутаатынан
Саамай оруннаахтык талбыттар.
Сокуон, парламент үлэтин
Сырдатар, кэпсиир-сэһэргиир
Суолталааҕын өйдөөҥҥүн,
Сүктэриллибит эбээһинэскэр
Сэргэстэһэ тэҥҥэ тутаҥҥын,
Сэмэй бэчээт кыһатын
Салайар дириэктэр дэммитиҥ,
Сүрүн эрдээктэр буолбутуҥ.
“Суруналыыстыка үрүҥ туллуга” диэн
Сайа бэйиэт бэргэнник эппитинии,
Ситиһиигинэн, үлэҕинэн
Сатабылгынан, дьоҕургунан
Саха омук кутун туттуҥ
Сырдык ааккын ааттаттыҥ.
Саас-үйэ тухары бар дьонуҥ
Сөҕүрүйбэт махтала,
Сылааһынан илгийэ,
Суолгун арчылыы турдун!
- 0
- 0
- 0
- 0
- 0
- 0