— Судаарыстыбаннай Дуумаҕа дьокутааты талыы сүрдээх көхтөөхтүк, таһаарыылаахтык ыытыллыбыта. Ол түмүгүнэн Забайкальскай кыраай биир мандааттаах уокуругунан дьокутаатынан талыллыбытым.
Госдумаҕа үлэ диэн, мин өйдөбүлбүнэн, үс хайысхаҕа арахсар. Саамай сүрүн хайысха уокуругу кытта үлэ буолуохтаах. Ол курдук, миигин дьокутаатынан талбыт дьону кытта балаҕан ыйыттан күннэтэ үлэлиибин, элбэх бириэмэбин, болҕомтобун аныыбын. Кинилэр кыһалҕаларын кэмитиэт үлэтин чэрчитинэн федеральнай таһымҥа туруорсабын.
Иккис хайысханан кэмитиэт үлэтэ буолар. Бэйэм Судаарыстыбаннай Дуума экологияҕа, айылҕа баайыгар уонна тулалыыр эйгэ харыстабылыгар кэмитиэтигэр баарбын. Балаҕан ыйыттан ахсынньы бүтүөр диэри араас сокуоннарга 180-тан тахса уларытыыны киллэрдибит.
Үлэ үһүс хайысхатынан баартыйаҕа үлэ буолар. Ол чэрчитинэн биэнсийэ реформатын, хас биирдии биэнсийэлээх биэнсийэтин кээмэйэ 10 тыһыынчаттан итэҕэһэ суох буолуутун, итиэннэ устудьуоннарга 13-с истипиэндьийэ төлөнүүтүн туруорсабыт.
"Сахапарламент" ааҕааччыларын, Саха сирин олохтоохторун Саҥа дьылынан эҕэрдэлиибин. Баҕарабын дьолу-соргуну, ситиһиилэри, туруоруммут сыалгытын толороргутугар. Иннибитигэр туох ханнык иннинэ төрөөбүт биһикпит – Саха АССР тэриллибитэ 100 сыла күүтэр. Онон олус элбэх, үтүө өрүттээх үлэ барыбытын көһүтэр. Элбэх тэрээһиннэр ыытыллаллара эрэйиллэр. Ону үбүлүүргэ өрөспүүбүлүкэбит бүддьүөтэ добуочча толоруллуо дии саныыбын.
-
0
-
0
-
0
-
0
-
0
-
0
