ХИФУ үөрэх дьыалатыгар проректора Алексей Голиков бэлиэтээбитинэн, эксээмэннэр онлайн ньыматынан ыытылла тураллар. «Бүгүҥҥү күҥҥэ быысаһар аттестация зачеттара уонна эксээмэннэри туттарыы тэрээһиннэрэ бигэргэтиллибит график быһыытынан ыытыллаллар. Манна үөрэнээччилэр ситиһиилэрин учуоттуурга балынан-рейтинг систиэмэтэ туһаныллар, оттон зачеттары уонна эксээмэннэри тутуу онлайн видеоконференция көмөтүнэн барар", - диир проректор.
Тохтоло суох үөрэхтээһин уонна каадыр политикатыгар проректора Михаил Федоров этэринэн, үрдүк үөрэх тэрилтэтэ үөрэх сылын онлайн түмүктүүргэ бэлэм. «Бүгүҥҥү күҥҥэ ХИФУ сүрүн идэ биэрэр үөрэхтээһин 467 бырагырааматын олоххо киллэрэр. Филиаллар, институттар Zoom видеосибээһинэн хааччыллыылаахтар. Бары кыһалҕалар учуоттананнар, диплом көмүскээһинин уонна ылыытын тэрээһиннэрэ быһаарыллыбыттара. Быйылгы сылга ХИФУ-гар- 3440, Мииринэй филиалыгар – 42, Нерюнгрига – 88, Чукоткаҕа – 18 устудьуон бүтэрэллэр. Университет үрдүнэн барыта 388 судаарыстыбаннай эксээмэн хамыыһыйата тэрилиннэ, ол иһигэр 98 хамыыһыйа судаарыстыбаннай эксээмэннэри тутуохтара, атыттар дипломнары көмүскээһин тэрээһиннэригэр үлэлиэхтэрэ", - диэн Михаил Федоров бэлиэтээтэ.
-
0
-
0
-
0
-
0
-
0
-
0
