«2022 с. алтынньытыттан дириэктэринэн үлэлиибин, оскуола кэлэктиибэ эдэр дьон, бары Хатыы оскуолатын бүтэрбит оҕолор кэлэн үлэлии сылдьабыт. Учууталлар орто саастара 40-ча, ол иһигэр 22-32-лээх эдэр үлэһиттэр бааллар. Иллэрээ сыллааҕыта «Тыа сирин учуутала» диэн муниципальнай бырагыраамаҕа киирбиппит, үс сылга дуогабардаһан үлэлээбит дьон 500 000 солк. ылаллар. Ити бырагырааманан иитэр үлэҕэ дириэктэри солбуйааччы, нуучча тылын учуутала, логопед кэлэн үлэлээн барбыттара.
Билиҥҥи туругунан каадырынан толору хаачыллан олоробут, эдэр учууталлар бары олохтоохтор, онон дьиэлээхтэр. Уопсай дьиэ суоҕун кэриэтэ, бэйэбит олохтоох уолаттарбыт кэлэр буолан, ити кыһалҕа быһаарыллан иһэр, дьонноругар олороллор, эбэтэр бэйэлэрэ дьиэлээхтэр.
Үөрэхтэрин саҥа бүтэрбит эдэр учууталлар хамнастара, холобур, 20 чаастаах информатика учуутала 56 000 солк. ылар, онуоха эбии кылаас салайааччыта буоллаҕына 80 000 солк. диэри эбиллэр. Онтон 25 сылтан ордук үлэлээбит уопуттаах учууталлар 100 000 солк. тахса хамнастаахтар. Маны таһынан, учууталлар Уһук Илиҥҥи ипэтиэкэҕэ киирэн, 0,1-2% куоракка дьиэ атыылаһаллар», — диэн кэпсиир оскуола дириэктэрэ Владимир Тимофеев.
Тыа сиригэр учуутал тиийбэт дииллэр этэ даҕаны, хамнас эбиллэн, бэрт намыһах бырыһыаннаах ипэтиэкэ көрүллэн, «Земскэй учуутал», «Тыа сирин учуутала» курдук бырагырааманан үгүөрү үп-харчы бэриллэн, бу идэ престиһэ улаатта, эдэр дьон тардыһар буолла.
Хаартыскалары Хатыы агро-оскуолата хааччыйда.
-
1
-
0
-
0
-
0
-
0
-
0
