Туспа бүддьүөт көрүллэн, үөрэнээччилэр, төрөппүттэр, учууталлар сүбэлэрин холбоон, баҕа санааларын олоххо киллэрэр кыахтаммыттара.
Онон оҕолор уопсастыбаннай олоххо, үөрэнэр сирдэрин ис-тас эйгэтин көрө сылдьан, туох алдьаммытын өрөмүөннүүргэ, тас көстүүтүн тупсарарга кыттан барбыттара. Кинилэр бэриллибит бүддьүөтү ырытан, үбү-харчыны үөрэнэр оскуолаларын инфраструктуратын сайыннарарга, саҥа оборудованиены атыылаһарга, араас тэрээһиннэри ыытарга үллэрэргэ үөрэммиттэрэ.
Бу саҥа саҕалааһын олоххо хайдах киирбитин туһунан СӨ өрөспүүбүлүкэтээҕи казначействотын нэһилиэнньэ көҕүлээһининэн бүддьүөтү оҥорууга салаа начаалынньыга Светлана Колодезникова билиһиннэрдэ.
Бырайыактарын көмүскүү, санааларын этэ үөрэнэллэр
Аан дойду үрдүнэн маннык саҕалааһын 2005 с. Францияҕа Пуату-Шарант эрэгийиэҥҥэ олоххо киирбитэ. Кинилэр уопуттара АХШ-га, Португалияҕа, Бразилияҕа, Германияҕа, Чехияҕа, уопсайынан аан дойду үрдүнэн киэҥник тарҕанан барбыта.
Арассыыйа үпкэ-харчыга министиэристибэтин научнай-чинчийэр үнүстүүтэ 2019 с. оскуола ис-тас көстүүтүн тупсарарга үөрэнээччилэр бырайыактарын үбүлүүргэ бүддьүөтү таҥыыны киллэрэн, эрэгийиэннэргэ тарҕаппыта.
2024 с. маннык саҕалааһын 29 субъекка олоххо киирбитэ, күн бүгүн 1816 бырайыак оҥоһулунна.
Светлана Романовна этэринэн, оҕолор бүддьүөтү тыырыыга кыттан, гражданскай эппиэтинэстэрэ үрдүүр, үөрэнэр сирдэрин тупсарарга кыһаллаллар, быһаарыныы ылынарга уһуйуллан, муниципальнай таһымҥа былаас уорганнарын кытта бииргэ үлэлэһэллэр, үп-харчы хантан кэлэрин, туохха ороскуоттанарын дьэҥкэтик өйдүүллэр. Ону таһынан, хамаанда тэринэн, идиэйэлэрин түмэн, элбэх киһи иннигэр тахсан бырайыактарын көмүскүү, санааларын этэ үөрэнэллэр.
2023 с. Саха Сиригэр оскуолаҕа бүддьүөтү тыырыы пилотнай бырайыак быһыытынан киирбитэ. Онно Дьокуускай куорат уонна Жатай уокуругуттан 10 оскуола кыттыбыттара.
Ити сыл Хатас оскуолатыгар дорожнай каарта оҥоһуллан, волонтердары мунньан, бырайыактары талыы туһунан видеоролик устубуттара. Үөрэнээччилэр олус кыра уонна кыраҕас гардеробтаахтарын бэлиэтии көрөн, көхөҕө ыйаабыт таҥастара куруук түһэ турарын туһунан эппиттэрэ. Онон таҥас ыйыыр гардеробу кэҥэтэр, улаатыннарар наадалааҕын ыйбыттара.
«Айыы кыһата” национальнай гимназияҕа куонкурус ыытан, бастыҥ бырайыактары талбыттара. Кыайбыт бырайыактары аҕалар уонна ийэлэр сүбэлэрэ үбүлээбитэ.
Үбүлээһин кээмэйэ улаатта
Оскуолаҕа бүддьүөтү көрүүгэ 2023 с. өрөспүүбүлүкэ бүддьүөтэ 3 мөл. солк. биэрбитэ. Бырабыыталыстыба уурааҕынан биир оскуолаҕа 300 000 солк. тиксэр. 2024 с. ити сыалга Саха Сирин бүддьүөтүттэн үбүлээһин кээмэйэ улаатан 5,7 мөл. солк. тиийэн, пилотнай бырайыак кыттааччылара эбиллэ түспүттэрэ.
2023 с. күһүнүгэр Арассыыйа үпкэ-харчыга министиэристибэтин научнай-чинчийэр үнүстүүтүн эспиэртэрэ кэлэн, оскуолаҕа бүддьүөтү таҥыы хайдах баран иһэрин билсибиттэрэ. Өрөспүүбүлүкэҕэ икки сыл иһигэр пилотнай бырайыак чэрчитинэн 133 көҕүлээһин баарыттан, үөрэнээччилэр 56 бырайыактара олоххо киирбит. Оскуолаҕа ханнык бырайыагы талар куоластааһын мунньаҕар 11926 үөрэнээччи уонна учуутал кыттыбыт.
Хаартысканы Светлана Колодезникова хааччыйда.
-
0
-
0
-
0
-
0
-
0
-
0
