Кини эҕэрдэ тылы этэригэр үнүбүрсүөт аныгы технологияны, пилота суох көтөр аалы салайар оҥоһуу өйү, саҥа матырыйаалы, квантовай суоту айарга төһүү оруоллааҕын бэлиэтээтэ. Аны аҕыйах сылынан эдэр ыччат билимҥэ, бырамыысыланнаска, экэниэмикэҕэ салайар үлэҕэ киирэрин иһитиннэрэн туран, эрэгийиэҥҥэ сонун көрүү, ураты быһаарыныы наадалааҕын эттэ. Онон устудьуоннар харса суох саҥаны боруобалыылларыгар, сонун сүүрээни этэртэн, сыыһа-халты туттунартан чаҕыйан турбаттарыгар баҕарда.
«70 сыл тухары ХИФУ учуонайдар, уһуйааччылар, устудьуоннар ситиһиилэринэн кынаттанан, улахан суолу тэлэн кэллэ. Үнүбүрсүөт өрүү даҕаны талба талааннаах, билимҥэ инникини өтө көрөр кэскиллээх дьону иитэн таһаарар, хаачыстыбалаах үөрэҕи биэрэр. Эдэр көлүөнэ ол үтүө үгэһи салгыаҕа диэн эрэнэбин. Саҥа үөрэх дьыла ситиһиилээх, чаҕылхай, устудьуон олоҕо толору дьоллоох буоллун!», — диэн эҕэрдэлээтэ Антонина Григорьева.
Ону таһынан, эҕэрдэ тылы ХИФУ ректора, Ил Түмэн дьокутаата Анатолий Николаев, СӨ Үөрэххэ уонна билимҥэ миниистирин бастакы солбуйааччы Виктория Захарова эттилэр. Ол туһунан Ил Түмэн пресс-сулууспата иһитиннэрэр.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
