Законодательство

ОДьКХ тарыыба 9 бырыһыан үрдүөҕэ

Ахсынньы 1 күнүттэн нэһилиэнньэҕэ олорор дьиэ-уот, хомунаалынай өҥөлөр тарыыптарын эрдэттэн индексациялааһын түмүгэр 9% үрдүө. Дойду Бырабыыталыстыбатын уурааҕа ахсынньы 1 күнүттэн күүһүгэр киирдэ. Индексация тымныы уонна итии ууга, электроэнергияҕа, ититии ситимигэр, гааска уонна бөҕү таһыы иһин төлөбүрү таарыйыаҕа.

Судаарыстыбаннай тэрилтэлэр - социальнай ситимнэргэ

Судаарыстыбаннай тэрилтэлэргэ саҥа эбээһинэс олохтонуоҕа — социальнай ситимнэргэ страницалары арыйыахтара уонна үлэлэтиэхтэрэ. Маннык сокуон ахсынньы 1 күнүттэн күүһүгэр киирдэ. Үгүс биэдэмистибэлэр уонна салайааччылар соцситимҥэ анал страницалары арыйаллара, ол эрээри кинилэр суруйар эбээһинэстэрэ суох этэ. Саҥа ылыныллыбыт нуормалар судаарыстыбаннай тэрилтэлэр үлэлэрэ нэһилиэнньэҕэ аһаҕас буолууларын уонна дьон информацияны судургутук ылар кыаҕын биэрэрэ сабаҕаланар.

Омук агеннарыгар саҥа хааччахтары киллэриэхтэрэ

Омук агеннарын тустарынан нуормалар, түөрт туһаныллар реестр оннугар биир сокуоҥҥа холбонон, ахсынньы 1 күнүттэн сокуон үлэлээтэ. Омук агеннара диэн тас дойдулар өйөбүллэринэн, дойдуга бэлитиичэскэй үлэнэн дьарыктанар, информационнай матырыйааллары уонна байыаннай сибидиэнньэни хомуйуунан дьарыктанар дьоннор уонна тэрилтэлэр буолаллар.  Маннык агеннар судаарыстыбаннай уонна муниципальнай тэрилтэлэргэ үөрэтэллэрэ, араас бырайыактарга көмөлөһөллѳрѳ уонна стратегическай суолталаах тэрилтэлэргэ инвестициялыыллара бобуллуоҕа. Ону тэҥэ нолуок чэпчэтиллибит систиэмэтигэр киирэр бырааптарыттан эмиэ маталлар. Кинилэр миитин, пикет уонна да атын публичнай дьаһаллары тэрийэр, быыбарга хандьыдаат уонна бэлитиичэскэй баартыйалар пуондаларыгар бэлэхтэри киллэрэр кыахтара суох буолуоҕа.

Мэдиссиинэ полиһа штрихкодка уларыйыа

Ахсынньы 1 күнүттэн  дойду олохтоохторугар кумааҕы полис наадата суох буолла. Бу докумуон сыыппара көрүҥэр уларыйар. Сокуон туһааннаах нуормалара ахсынньы 1 күнүттэн киирдэ. Докумуон саҥа көрүҥэ «массыына ааҕар уһулуччулаах утумнаах» диэн этэллэр. ОМС систиэмэтигэр страховкаламмыт сирэйдэри биир реестргэ сыһыарары былаанныыллар. Холобур, докумуону смартфоҥҥа тутуохха сөп. Булгуччулаах мэдиссиинэ страховкалааһына босхо көмөнү ылар быраабы биэрэр. Полис бырааһы дьиэҕэ ыҥырарга, чинчийиини ааһарга, поликлиникаҕа уонна стационарга эмтэнэргэ көмөлүүр. Билигин полиһы штрихкод быһыытынан да, кумааҕыга да туһаныахха сөп буолла.

Кыбартаалларга — хамаама

Элбэх кыбартыыралаах тутууларга хамааманы уонна инфракраснай кабиналары туттуохха сөп буолла. МЧС итинник бирикээһэ ахсынньы 1 күнүттэн күүһүгэр киирдэ. Онуоха кыбартыыраларга баанньык уонна сауна тэриллэрин туруорууга бобуу күүһүнэн хаалар. Маны таһынан министиэристибэҕэ олорор дьиэлэргэ миэбэл маҕаһыыннарын туруорууга бобууну киллэрдилэр. Бирикээс быһыытынан, маннык маҕаһыыннарга быыстапкалыыр саалалары, дизайн устуудьуйаларын уонна миэбэл сакаастарын суруйуу кэнсиэрдэрин тэрийиэххэ сөп. Ол эрээри онно ыскылааттар баар буолаллара бобуллар.

Футбол ыалдьааччытын хаартата

Футболга премьер-лига хамаандаларын ортолоругар Арасыыйа чөмпүйэнээтин ханнык баҕарар матчыгар сылдьарыгар футбол ыалдьааччытын хаартата анаан оҥоһуллуохтаах. Бу туһунан РФ Бырабыыталыстыбатын дьаһала ахсынньы 1 күнүттэн үлэлиир. Маннык хаарта официальнай турнирдар кэмнэригэр трибуналарга куттал суох буолуутун быһаарарга туһуланар. Хаарта хаһаайына урукку матчтарга хайдах быһыылаахтык сылдьыбытын кэтээн көрөргө кыаҕы үөскэтэр. Өскөтүн күлүгээннээтэҕинэ, стадиоҥҥа киирэр кыаҕа быһыллар.

Оҕо быраабын көмүскээһин күүһүрүө

Анал үөрэтэр-иитэр тэрилтэлэргэ ыытылларга сууттаммыт сокуоннай саастарын ситэ илик оҕолор боппуруостарын холуобунай дьыалалаан буолбакка, административнай суукка көрүөхтэрэ. Маннык сокуон ахсынньы 2 күнүттэн үлэлиэҕэ. Сокуоннай саастарын ситэ илик оҕолор суут дьыалатыгар кыттыахтарын, квалификациялаах юридическай көмөнү ылыахтарын уонна суут быһаарыытын ааһыныахтарын сөп.

Патеннар статустара чуолкайданыа

Былаас уорганнара уонна тэрилтэлэр ый иһигэр патентнай итэҕэллээх ыйыппыт сибидиэнньэлэрин биэриэхтээхтэр. Сокуон нуормалара ахсынньы 22 күнүгэр күүһүгэр киириэҕэ. Патентнай итэҕэллээх статуһун сөптөөх квалификациялаах уонна уопуттаах дьоҥҥо биэриэхтэрэ. Патентнай итэҕэллээҕинэн бас билээччилэр, о.д.а. интэриэстээх гражданнар уонна тэрилтэлэр, сайабылыанньа суруйааччылар буолаллар. Кинилэри кытта үлэ биэрээччи өҥөнү оҥорор усулуобуйаҕа дуогабар түһэрсэр.

Биосфернай полигоннары оҥоруу

Судаарыстыба көрүүтүгэр баар ураты харыстанар сирдэргэ саҥа биосфернай полигоннары оҥоруу сокуонунан бобуллуоҕа. Маннык сокуон ахсынньы 26 күнүттэн күүһүгэр киириэҕэ. Урут тэриллибит полигоннар оннуларынан хаалыахтара уонна салгыы үлэлиэхтэрэ. Маннык полигоннар эрэгийиэннэр экосистиэмэлэрин харыстыырга уонна үөрэтэргэ анаан тэриллибиттэрэ. 2011 сылтан маннык зоналарга туризмы сайыннарар уонна инфраструктураны тутар туһунан быһаарыы ылыммыттара.

Юридическай бюролар отчуоттара

Босхо юридическай көмө тиһигин кыттыылаахтара, ол иһигэр үрдүк үөрэх кыһаларыгар «юридическай клиникалар», РФ Юстиция министэристибэтин иннигэр үлэлэрин отчуоттуохтаахтар. Маннык сокуон ахсынньы 26 күнүттэн үлэлиэҕэ. Бу сокуон босхо юридическай көмөнү оҥоруу кыттыылаахтара тустаах биэдэмистибэлэргэ иһитиннэриини, дакылааты оҥорорго эбээһинэстээтэ. Ону тэҥэ докумуон судаарыстыбаннайа суох юридическай көмө оҥоруу субъектарын испииһэгин кэҥэттэ. Юридическай бюролар диэн буолбакка, юридическай клиникалар диэн ааттаныахтара.

Бренд кыраныысса таһыгар көмүскэниэ

Арассыыйа эрэгийиэннээҕи брендтарыгар табаар үөскээбит сирин, аатын регистрациялааһыҥҥа ороскуоту намтатыахтара, омук ырыынактарыгар тахсар суолун-ииһин судургутутуохтара. Бу сокуон сыл бүтүүтэ, ахсынньы 31 күнүттэн, үлэлиэҕэ. Бу быһаарыы эрэгийиэннээҕи брендтары көмүскүүргэ көмөлѳhүө, ону тэҥэ эрэгийиэннэр экэнэмиичэскэй сайдыыларыгар уонна олохтоох оҥорон таһаарааччылары өйөөһүҥҥэ саҥа кыахтары үөскэтиэ диэн сабаҕаланар.