Анал этии туһунан Ил Түмэн бүддьүөккэ, үпкэ-харчыга, нолуок уонна сыана бэлиитикэтигэр сис кэмитиэтин бэрэссэдээтэлэ Юрий Николаев бэйэтин санаатын үллэһиннэ.
«Бэрэсидьиэн сүрүн болҕомтотун дойдуларын туһугар ытык иэстэрин толоро сылдьан сырдык тыыннара быстыбыт байыастар дьиэ кэргэттэригэр, байыаннай эппэрээссийэ бары кыттыылаахтарыгар көмө оҥорорго уурда. Ону олоххо киллэрэргэ анал пуонда тэриллэн үлэлиэҕэ, итиэннэ байыаннайдарга, кинилэр дьиэ кэргэттэригэр оҥоһуллар көмө барыта оннунан хаалыаҕа.
Күн бүгүн дойду куттала суох буолуутун хааччыйыы уонна экэниэмикэни сайыннарыы сүрүн соруктар ахсааннарыгар киирэллэр. Арҕаа дойдулар Арассыыйа экэниэмикэтэ эстиэ диэн күтүрээбиттэрэ 2022 с. Арассыыйаҕа ВВП 2,1% түстэ.
Холобур, бурдугу хомуйуу кээмэйэ байыаннай эппэрээссийэ иннинээҕи өлгөм үүнүүлээх кэми кытта тэҥнээтэххэ, икки төгүл улаатта. 50 мөл. туонна бурдугу дойду тас өттүгэр атыыга таһаарабыт, баара-суоҕа икки сыллааҕыта Арассыыйа үрдүнэн итиччэ бурдугу хомуйар этибит.
Владимир Путин Уһук Илин, Аартыка, хотугу муора суолун сайдыыларын сүрүн суолталаах хайысха быһыытынан бэлиэтээтэ, биһиги өрөспүүбүлүкэбитигэр ити ыкса сыһыаннаах», — диэн эттэ Юрий Николаев.
Ону таһынан, урбаан бэрэстэбиитэллэригэр 3-7 сылга болдьохтоон, 500 мөл. солк. диэри 3% бырамыысыланнай ипотека бэриллиэҕэ.
Хамнас алын кээмэйэ 18,5% үрдүөҕэ, ол аата Арассыыйаҕа 19 242 солк. тэҥнэһиэҕэ. Санатан эттэххэ, ити суумаҕа хотугу эбилик ааҕыллан, Саха Сиригэр алын хамнас 40 000 солк. куоһарыахтаах.
-
3
-
0
-
0
-
0
-
0
-
0
