Федерация Сэбиэтин федеративнай тутулга, эрэгийиэннээҕи бэлиитикэҕэ, олохтоох бэйэни салайыныыга уонна хоту дойду дьыалаларыгар кэмитиэт бэрэссэдээтэлэ Андрей Шевченко эппитинэн, өрөспүүбүлүкэ социальнай-экэнэмиичэскэй сайдыытын торумнуур уураах соторутааҕыта тахсыбыта эрээри, номнуо улахан үлэ ыытылынна.
«Араас бырагыраамаларга кыттарга сайаапка оҥоһулунна. Сүрүн эбийиэк Өлүөнэ эбэни туоруур күргэ тула кэпсэттибит. Бүддьүөккэ урут хаһан да көрүллүбэтэх үп көрүлүннэ. Алтынньыга-сэтинньигэ «Главгосэкспертиза» түмүк таһаарбытын кэннэ төһө суума тахсара чуолкайданыа. Бырабыыталыстыба быһаарыытынан, бу бырайыак олоххо булгуччу киириэҕэ», — диэн бэлиэтээтэ.
Ил Түмэн Бэрэссэдээтэлэ Алексей Еремеев СӨ социальнай-экэнэмиичэскэй сайдыытын туһунан уураах биир сыл кэриҥэ оҥоһуллубутун билиһиннэрдэ.
«Уураах кэлэр сылга бүддьүөт оҥоһуллубутун кэннэ биирдэ ахсынньыга баттаммыта, ол иһин 2023 с. үбүлээһинигэр киирэр уустук этэ. Ол да буоллар, ХИФУ уопсайын өрөмүөнэ быйылгы сыл бүддьүөтүгэр киирдэ. Биллэн турар, үлэ улахан аҥаара 2024-2026 сс. ыытыллыаҕа.
Дьокуускайга инфекционнай балыыһа, итиэннэ Муусука үрдүкү оскуолатын тутуутун 2024 с. киллэрэргэ туруорсабыт.
Федерация Сэбиэтигэр, чуолаан бэрэссэдээтэл Валентина Матвиенкоҕа истиҥ махталбытын тиэрдэбит. Өлүөнэ эбэни туоруур муоста тутуутун федеральнай киин 50% уйунуоҕа. Урукку өттүгэр кыттыгас үбүлээһин икки өттүттэн 33% диэн этэ.
Ону таһынан, өрөспүүбүлүкэҕэ аэропуортар ситимнэрин сайыннарыыга улахан болҕомто уурулунна», — диэтэ Алексей Ильич.
Кини этэринэн, успуорт эбийиэктэрин тутууну РФ Успуордун министиэристибэтэ көҕүрэтэ олорор эрээри, федеральнай үбүлээһиҥҥэ Дьокуускай куоракка Ильменскай уулуссаҕа тутулла турар эбийиэги киллэриэхтэрэ диэн эрэлин биллэрдэ.
Кирилл Бычков, СӨ Бэрэссэдээтэлин бастакы солбуйааччыта Федерация Сэбиэтиттэн кэлбит дэлэгээссийэ Дьокуускайга эрэ буолбакка, Аартыка оройуоннарыгар эмиэ сылдьан, дьон олоҕун-дьаһаҕын билсибитин туһунан эттэ.
«Бу уураахха хаһан, ханнык эбийиэк тутуллара сиһилии сурулла сылдьар. Федерация Сэбиэтин өйөбүлүнэн Өлүөнэ эбэни туоруур күргэ оҥоһуллуоҕа.
Эһиил «Азия оҕолоро» спортивнай оонньуу буолуоҕа, онон социальнай, спортивнай эбийиэктэр, ХИФУ үөрэнэр-лабораторнай куорпуһа, кампустар тутуллуохтара.
Онон өрөспүүбүлүкэбитин салгыы сайыннарарга күүспүтүн түмэн үлэлиэхпит», — диэн түмүктээтэ.
-
1
-
0
-
0
-
0
-
0
-
0
