Владимир Путин Федеральнай Мунньахха туһаайан Этиитин иһитиннэриитэ 2024 с. олунньу 23 - кулун тутар 8 күннэригэр диэри ыытыллара былааннанар диэн дойду Бэрэсидьиэнин дьаһалтатыгар эттилэр. Итини сэргэ ордук олунньу бүтүүтэ ыытыллыан сөп эрээри, күнэ-дьыла кыратык халбарыйыан сөп диэн быһаараллар.
Докумуон сүрүн этиилэрэ билиҥҥэ диэри чопчу биллибэт, ол гынан баран анал байыаннай дьайыыга (СВО), дойду суверенитетыгар, социальнай- экэнэмиичэскэй сайдыытыгар уонна дьиэ кэргэн сыаннастарыгар ананыаҕа диэн сабаҕаланар.
Санатар буоллахха, Бэрэсидьиэн быыбара 2018 с. кулун тутар 18 күнүгэр ыытыллыбыта, оттон Федеральнай Мунньахха туһаайан Этиитэ кулун тутар 1 күнүгэр буолбута. Ити курдук быйыл эмиэ парламентарийдар иннилэригэр туһаайан Этиитэ быыбар иннинэ буолара күүтүллэр.
Бэрэсидьиэн пресс-сэкиритээрэ Дмитрий Песков суруналыыстарга этэринэн, билигин бэлэмнэнии үлэ барар уонна чопчу больдоҕо сотору кэминэн биллиэҕэ. Этиигэ Бэрэсидьиэн демография уонна элбэх оҕолоох буолуу тиэмэлэрин таарыйара былааннанар. Холобур, 2024 с. тохсунньу 23 күнүгэр «Родные-любимые» пуорумҥа Владимир Путин дьиэ кэргэн сыаннастарын уонна Арассыыйа улахан дьиэ кэргэн курдук дьоһун суолталааҕын тустарынан эппитэ.
-
0
-
0
-
0
-
0
-
0
-
1
