Ил Түмэн судаарыстыбаннай тутууга уонна сокуоҥҥа сис кэмитиэтин бэрэссэдээтэлэ Афанасий Владимиров иһитиннэрбитинэн, өрөспүүбүлүкэ сокуонун федеральнай сокуоҥҥа сөп түбэһиннэрэр сыалтан уларытыылар киирэллэр. Чуолаан, омук агеннара бары таһымнаах быыбарга кыттар кыахтара суох буолар. Сокуон барыла этэринэн, быыбардыыр хамыыһыйа чилиэнинэн РФ Сенатордара, нацискай атрибутиканы, экстремисткай, террористическай түмсүүлэр матырыйаалларын тарҕаппыт, кинилэргэ киирэр, административнай буруйу оҥорбут дьон буолбаттар. Быыбарга киирсэр хандьыдаат омук агена диэн статуһа суох буолара ирдэнэр.
Быыбарга кэтээн көрөөччү быһыытынан РФ Сенатордара, ону таһынан, омук агеннара, экстремисткай, террористическай түмсүүлэр чилиэннэрэ буолаллара бобуллар.
Ил Түмэн хотугу аҕыйах ахсааннаах норуоттар боппуруостарыгар уонна Аартыка дьыалаларыгар сис кэмитиэтин бэрэссэдээтэлэ Елена Голомарева омук агенын хайдах быһааралларын ыйыталаста. Федеральнай сокуоҥҥа олоҕуран, ону РФ Юстицияҕа министиэристибэтэ быһаарар боломуочуйалаах.
Ил Түмэн култуураҕа уонна сонуннары тарҕатар ситимҥэ сис кэмитиэтин бэрэссэдээтэлэ Виктор Губарев: «Минюст аһаҕас дааннайынан, быйыл кулун тутарга 579 омук агена бэлиэтэммит, оттон 2021 с. баара-суоҕа биэс эрэ этилэр. Судаарыстыбаннай Дуумаҕа КПРФ фракцията быыбардыыр кодекса бырайыагын киллэрбитэ, онтон биирдэстэрэ омук агенын статуһун чуолкайдыырга. Биһиги өрөспүүбүлүкэбитигэр Минюст аахпытынан, 4 омук агена баара биллибит, икки уопсастыбаннай түмсүү, икки чааһынай дьон», диэн санаатын үллэһиннэ. Кини быыбарга омук агеннара кыттар бырааптарын тохтотор сокуон барылын өйүүргэ ыҥырда.
Гражданнар быыбарбыыр уонна референдумҥа кыттар бырааптарын эйгэтигэр СӨ тустаах сокуонун аакталарыгар уларытыылары киллэрэр сокуон барылын бастакы уонна иккис, бүтэһик ааҕыыга ылыннылар.
Василий Кононов хаартыскаҕа түһэриитэ.
- 0
- 0
- 0
- 0
- 0
- 0