Бэлиитикэ

Бастатан туран, дьокутаат Анал байыаннай дьайыы кыттыылаахтарын оҕолоро соҕуруу, Краснодарскай кыраайга сынньана тиийэн баран, санитарнай ирдэбилгэ эппиэттээбэт сонотуоруйга түбэспиттэрин уонна ону быһаарсыыга туох үлэ ыытыллыбытын бэлиэтээбит. “Оҕолор сынньалаҥнарын тэрийээччилэр тугу оҥорбуттарын барытын ырытан, сыанабыл биэриэххэ наада”, - диэн тоһоҕолоон эппит.  

Өрөспүүбүлүкэ бырабыыталыстыбатын бэрэссэдээтэлэ Кирилл Бычковы, эппиэттээх миниистирдэри кытта көрсүһүүгэ Үөһээ Дьааҥы биэрэги бөҕөргөтүү үлэлэрин ыытыы, аччыгый нэһилиэнньэлээх пууннарга уунан хааччыйар, канализациялаах-ыраастыыр ыстаансыйалары тутуу, Сангаар шахтатыгар сир аннынааҕы баһаары тохтотуу уо.д.а федеральнай бүддьүөттэн үбүлээһини эрэйэр боппуруостары быһаарыстыбыт диэн дьокутаат билиһиннэрбит. 

“Үөрэхтээһин систиэмэтин модернизациялааһын”  федеральнай бырагыраама Саха Сиригэр хайдах олоххо киллэриллэрин туһунан СӨ Үөрэҕириигэ уонна билимҥэ миниистирин Нюргуна  Соколовалыын сиһилии кэпсэттибит диэбит. Өрөспүүбүлүкэҕэ тупсарыллыбыт үөрэх эйгэтин тэрийиигэ туһуламмыт Норуот бырагырааматынан 95 оскуола тэриллибит, ол иһиттэн 17 Аартыка суонатыгар киирэллэр.    Миниистир этэринэн, 2027 сыллаахха диэри уопсай үөрэхтээһин 84 тутуутугар хапытаалынай өрөмүөнү биир-икки сыл устата  ыытар туһунан сайаапка РФ Үөрэхтээһиҥҥэ министиэристибэтигэр ыытыллыбыт.  

“Биир Ньыгыл Арассыыйа” баартыйа ыстаабыгар кыраасданнары кытта көрсүһүү 4 чаас устата барбыт. Боппуруостар үксүтэ социальнай өртүнэн ордук сытыытык тураллар.  АБДь кыттыылахтарын дьиэ кэргэттэрэ араас уустуктары көрсөллөрө, быыстала суох реабилитацияны ааһыахтаах, идэтийбит көрүүгэ-истиигэ, матырыйаалынай көмөҕө наадыйар инбэлиит оҕолоох төрөппүттэр кыһалҕалара онно биир бастакынан турдулар. Ону  тэҥэ, дьиэтэ-уота суох, пропискаланар кыахтара суох ыарыһах кыраасданнар тиийбэт-түгэммэт  олохторо муниципалитет уонна эрэгийиэн таһымыгар куруук болҕомто киинигэр сылдьыахтаах. Ону быһаарарга араас варианнары барытын көрөн, көрдөөн булуохха наада диэн дьокутаат сөпкө ыйар.  

СӨ Үпкэ министиэристибэтин салалтатын кытта көрсүһүүгэ бүддьүөт, нолуок сокуоннарын туһунан боппуруостары уонна 3-с сыллаах сомоҕо бүддьүөтү оҥорууга саҥа көрүҥнэр киириилэрин дьүүллэстибит, быһаарыстыбыт диэн этэр. Ону тэҥэ, хас да министиэриэстибэ: Аартыка дьыалаларыгар, Тырааныспарга, Үөрэҕириигэ бэрэстэбиитэллэрин уонна ГАИ СӨ управлениетын эппиэттээх үлэһиттэрин кытта көрсөн, Аартыка улуустарын олохтоохторо, кэллиэстэр устудьуоннара, кинилэртэн тутулга суох биричиинэнэн суоппар быраабын ыларга эксээмэннэрин кыайан туттарбаттарын уонна ону хайдах быһаарар туһунан сиһилии кэпсэттибит диэн саайтка суруллубут.

“Нерюнгри оройуонун Чульман бөһүөлэгэр почта отделениетын кэҥэтии боппуруоһун быһаарыга көмөм иһин “Почта России” Саха Сириээҕи филиалын салалтата  махталын биллэрдэ. Бу почта отделениетын дьиэтэ ирдэбилгэ кыайан эппиэттэбэт буолан олохтоохтор уонна үлэһиттэр олус эрэйдэммиттэрин билэрим.

Култуура нэһилиэстибэтин эбийиэктэрин харыстааһыҥҥа управление салайааччыта Николай Макаровы кытта көрсүһүүгэ Покровскай куоракка баар “Серго Орджоникидзе мусуой-дьиэтин” харыстааһыҥҥа уонна чөлүгэр түһэриигэ туох үлэ ыытылла турарын чуолкайдастыбыт. Бу эбийиэк  федеральнай суолталаах култуура нэһилиэстибэтинэн биллэриллэн турар. Ону тэҥэ, Томпо улууһун Мэҥэ Алдан сэлиэнньэтин Култуура дьиэтин дириэктэрэ Елена Степанованы кытта кэпсэтиигэ саҥа кулууп дьиэтин  тутуутун “Култуура” нацбырайыакка киллэрэр наадатын ыйдыбыт. Култуура уонна духуобунас миниистирэ Афанасий Ноевы кытта төлөпүөнүнэн кэпсэтиигэ, ханнык эбийиэктэри нацбырайыакка киллэрэр уонна онно докумуоннааһын туһунан информацияны министиэристибэ уһаппакка бэлэмниэхтээҕин, салгыы федеральнай биэдимэстибэлэргэ туруорсууну ыытар туһунан быһаарыстыбыт”, -диэн Госдуума дьокутаата Галина Иннокентьевна Данчикова  эрэгийиэннээҕи нэдиэлэтин билиһиннэрэр.