Онтон Ил Түмэн тэриллиэҕиттэн уопсай отделга, аппараат салайааччытынан, солбуйааччытынан лоп курдук 30 сыл араас тэрээһиннэри ыытарга, хаһаайыстыбаннай боппуруостары быһаарарга үлэлээн кэллэ. Билигин Ил Түмэн аппараатын салайааччытын сүбэһитэ, бэтэрээннэр сэбиэттэрин салайааччыта.
Бэтэрээннэр сэбиэттэрин Ил Түмэн бэрэссэдээтэлин бастакы солбуйааччыта Александр Жирков көҕүлээһининэн тэрийбиттэрэ. Бу түмсүүгэ 62 киһи баар, манна урут бастайааннай үлэҕэ 5 сыл үлэлээбит, Ил Түмэнтэн биэнсийэҕэ барбыт дьокутааттар, аппараакка 10 сыл үлэ ыстаастаах, онтон бочуоттаах сынньалаҥҥа барбыт дьон киирэллэр.
Бэтэрээннэри Кыайыы уонна Аҕам саастаах дьон күнүгэр ыҥыран, Ил Түмэн салалтатын, дьокутааттары кытта көрсүһүү тэрийэллэр, дьиэҕэ олорор дьон ким туох кыһалҕалааҕын быһаарсаллар, көмө оҥороллор. Ону таһынан, Саҥа Дьылга эҕэрдэлииллэр, Ыһыахха, өрөспүүбүлүкэ бары тэрээһиннэригэр ыҥыртыыллар. Бэтэрээннэр сэбиэттэригэр Үрдүкү Сэбиэт бэрэссэдээтэллэрэ Люлия Григорьева, Климент Иванов о.д.а. бааллар. Бэтэрээннэр сэбиэттэригэр урукку дьокутааттар сүүрбэччэлэр, кинилэр эдэр көлүөнэҕэ сүбэ-ама буолаллар. Кырдьаҕас бэтэрээн олохтон туораатаҕына, чугас дьонугар харчынан көмө оҥоһуллар.
«Аан бастаан Ил Түмэҥҥэ үлэлии кэлэрбэр туһунан дьиэбит суох этэ. Ол иһин икки балааталаах парламент маҥнайгы ыҥырыытын дьокутааттара Бырабыыталыстыба дьиэтин иккис этээһигэр олорон үлэлээбиттэрэ. Онтон дьокутааттар туруорсууларынан Михаил Николаев 1994 с. Ярославскай уулуссаҕа турар туһунан дьиэ биэрбитэ. Үлэһиттэри кытта бэйэбит субуотунньуктаан, бөҕү-сыыһы хомуйан, үлэлиир сирбитин тэриммиппит.
Бэтэрээннэрбитин кытта быйыл алтынньы 4 күнүгэр көрсүөхпүт. Кинилэр «Ил Түмэн» хаһыаты суруттаран ааҕаллар, уопсастыбаҕа туох буола турарын, ханнык сокуон тахсарын барытын билэллэр, этиилэрин киллэрэллэр, санааларын этэллэр. Хас көрсүһүү аайы кинилэр тугу эппиттэрин барытын устабыт, устуоруйаҕа тиһэбит, тэрийэр салаа управлениета ону көрөн анаалыстыыр.
Күн бүгүн Ил Түмэҥҥэ эдэр эрээри уопуттаах, үлэһит дьон кэлэллэр. Парламент тэриллиэҕиттэн баччааҥҥа диэри өр кэмҥэ үлэлээн кэлбиппэр туох да кистэлэҥ суох, дьон сиэринэн үлэлии сылдьабын», - диэн сэмэйдик этэр Мария Яковлевна.
Василий Кононов хаартыскаҕа түһэриитэ.
-
2
-
0
-
0
-
0
-
0
-
0
