Бу туһунан The New York Times (NYT) Америка чунуобунньуктарын иһитиннэриилэригэр олоҕуран суруйда. Туһааннаах иһитиннэриини Reuters ааҕыныстыба эмиэ бигэргэттэ.
Госдуума Норуоттар икки ардыларынааҕы дьыалаларга кэмитиэтин бэрэссэдээтэлэ Леонид Слуцкай ТАСС-ка биллэрбитинэн, америка ракеталарынан Арассыыйа сирин-уотун ытыалааһын утарыта турсуу өссө дириҥииригэр тириэрдиэҕэ. Госдуума Норуоттар икки ардыларынааҕы дьыалаларга кэмитиэтин чилиэнэ Дмитрий Белик РИА Новости эппитинэн, Джо Байден дьайыынан ааспыт быыбарга кыайбыт Дональд Трамп кэпсэтии процесстарын ыытарын атахтыы сатыыра көстөр.
Байден ылыммыт быһаарыыта АХШ бэлиитикэтигэр улахан уларытыыны киллэрэр тустаах. Аны икки ыйынан Америка бэрэсидьиэнин дуоһунаһыгар киирэр Дональд Трамп Украинаҕа көмөнү букатын аччатар былааннааҕа биллэр.
Байден ыраах тэбэр ATACMS ракеталарынан Арассыыйа территориятыгар ытыалыыр туһунан быһаарыытын «Арассыыйа анал байыаннай дьайыыга Хотугу Кэриэйэ саллааттарын кытыннарар» диэн сурахтан ылыммыт буолуон сөп диэн Америка чунуобунньуктара кэпсииллэр. Ол курдук, кинилэр АБДь-га кытталларын туһунан Бразилияҕа G20 саммикка дьүүллэһэллэрэ былааннанар.
Америка быһаарыыта Украина иирсээнигэр улахан уларытыыны киллэриэ суоҕа диэн The New York Times (NYT) суруйар.
Арассыыйа Бэрэсидьиэнин пресс-сэкэритээрэ Дмитрий Песков балаҕан ыйыгар Вашингтон Украинаҕа ыраах тэбэр ракеталарынан Арассыыйа территориятыгар ытыалыырга көҥүл ылыммытын туһунан биллэрбитэ. Сайынын CNN ханаал ыраах тэбэр ракета ахсаана аҕыйах буолан көҥүл биэрбэтэхтэрин туһунан суруйбута.
Хаартыска Госдуума саайтыттан.
-
0
-
0
-
0
-
0
-
0
-
0
