Ил Түмэн хонтуруоллуур кэмитиэтин бэрэссэдээтэлэ Андрей Николаев:
– Биһиги Саха Өрөспүүбүлүкэтин Счетнай балаататын кытта бииргэ үлэлэһэбит, холобур, доруобуйа харыстабылын салаатын, эбэтэр тыа хаһаайыстыбатын, судаарыстыбаннай тэрилтэлэри бэрэбиэркэлииргэ сыллааҕы былаан оҥоһуллар. Аудитордар бүддьүөттэн көрүллүбүт харчы төһө сөпкө туттуллубутун, министиэристибэлэр үлэлэрин бэрэбиэркэлииллэр. Быйыл Счетнай балаата бэйэтин хонтуруолугар эбии түөрт улууһу ылан, эбии аҕыс үлэ миэстэтин көрдүбүт.
Счетнай балаата Саха Сирин үрдүнэн ыытыллар бэрэбиэркэлиир-хонтуруоллуур үлэ түмүгүн сыл ахсын Ил Түмэҥҥэ отчуоттуур.
Быйылгы былааммыт диэн парламент истиитин түмүктэригэр резолюция тахсыбытын, пленарнай мунньаҕы ааспыт боппуруостар толорууларын көрүөхтээхпит.
Ону таһынан, национальнай бырайыактар, судаарыстыбаннай бырагыраамалар төһө туолбуттарын, итиэннэ федеральнай уонна өрөспүүбүлүкэ сокуоннарын толорууну хонтуруоллуубут.
Холобур, доруобуйа харыстабылыгар национальнай бырайыак туолуутун көрөргө хас балыыһа, биэлсэр-акушер пууна тутуллубутун, үлэһиттэринэн хааччыллыыны, нэһилиэнньэттэн киирэр боппуруос хайдах туолан иһэрин билсэбит.
Саҥа Дьыл туһунан эттэххэ, мин оҕо сааһым Сэбиэскэй кэмҥэ ааспыта, ол саҕана оҕо саадыгар утренниктар ыытыллар этилэр. Оччолорго билиҥҥи курдук маҕаһыыҥҥа минньигэс, фрукта дэлэгэй буолбатах этэ. Мандарин, апельсин, дьаабылыка бырааһынньыкка, Саҥа Дьылга эрэ кэлэр күндү ас буолан, оҕо аймах Тымныы оҕонньор хаһан бэлэх аҕаларын күүтэрэ. Мандарин сыта билиҥээҥҥэ диэри Саҥа Дьыл бырааһынньыгын санатар.
Дьиэбитигэр ийэбит бэрэски буһарара, аҕабыт ойууртан тыыннаах харыйаны аҕалан, оҕолор бары киэргэтэрбит. Билигин сыл ахсын үтүө үгэс быһыытынан, туох эрэ ырааһы, сырдыгы күүтэбит, 2020 с. хамсык дьаҥа бүтэрин, билигин Анал байыаннай дьайыы түмүктэнэрин кэтэһэбит.
2025 с. баҕарыам этэ бар дьоҥҥо чэгиэн доруобуйаны, эйэлээх ыраас халлааны, ким даҕаны биһиги кэккэбититтэн туораабатын, Анал байыаннай дьайыыга кыайыыны-хотууну!
Баҕа санаа туоларыгар хайа баҕарар түгэҥҥэ санааҕын түһэрбэккэ туруоруммут сыалгар баран иһиэххин наада. Биһиги, норуот дьокутааттара, өрөспүүбүлүкэбитин сайыннарбыт киһи диэн санаалаахпыт, мин тус бэйэм дойдум, Сунтаарым туһугар үлэлиибин.
Күн бүгүн улуус киинигэр лиссиэй, бассейн, Элгээйигэ балыыһа тутулла турар, өссө да атын социальнай эбийиэктэри тутарга, өрөмүөннүүргэ былаан элбэх.
-
1
-
0
-
0
-
0
-
0
-
0
