Ил Түмэн сиргэ-уокка, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин:
— Сис кэмитиэппит хайысхатынан дьоммут-сэргэбит олоҕун чэпчэтэр, үлэҕэ-хамнаска сыһыаннаах 15 сокуону бигэргэттибит, онтон 8 сокуон барылын дьокутааттар көҕүлээһиннэринэн, бэлэмнээн киллэрдибит. Онон нэһилиэнньэ олоҕун тупсарарга анаммыт үчүгэй сокуоннардаах сылы түмүктээн эрэбит диэн бэлиэтиибин.
Холобурдаан эттэххэ, эр дьоммут сааскы-күһүҥҥү куһу, мас көтөрүн бултааһыҥҥа көҥүл докумуонун уочараттаан, биирдэ күргүөмүнэн ыкпаттарын туһугар "Булт туһунан..." сокуоҥҥа уларытыы киллэрэммит, булчуттарбыт бэйэлэрэ сөбүлээн көрөн, сылы эргиччи хаһан баҕарар көҥүлү ылар усулуобуйаларын тэрийдибит. Ону таһынан, Саха Өрөспүүбүлүкэтин туһааннаах сокуоннарыгар уопсастыбаннай экологическай хонтуруолга уопсастыбанньыктар оруолларын үрдэтии, "Уһук Илин гектарынан" сир ылбыт дьоҥҥо тыа маһын тутталларыгар нуорманы икки төгүл улаатыннарыы курдук уларытыылары киллэрдибит.
Уопсайынан, Саҥа Дьыл оҕо аймахха ордук кэтэһиилээх, чугас бырааһынньык. Ол иһин, саҥа дьыллааҕы бэлэх тутартан ордук дьикти, ураты түгэн суох. Дьиэ кэргэнинэн бырааһынньыктааҕы харыйа тула түмсэн, бэлэх бэрсэр, сылаас истиҥ тыллары этэр туохтааҕар да күндү.
Билигин төһө да саас эбиллибитин иһин, саҥа дьыллааҕы бэлэх өйдөбүлэ: тыыннаах харыйа, дьаабылака, сакалаат сибиэһэй сыттара хас бырааһынньык аайы ааспат-арахпат ахтылҕан курдук киирэн кэлэр.
Олохсуйбут үтүө үгэс быһыытынан, Саҥа Дьыл - дьиэ кэргэн бырааһынньыга. Онон саамай чугас дьоммутугар этэҥҥэ буолууну баҕарартан ордук туох да суох. Кинилэр чэгиэн-чэбдик, доруобай, үөрэ-көтө сылдьаллара, истиҥ үөрүүлэрэ миэхэ саамай күндү бэлэх.
-
0
-
0
-
0
-
0
-
0
-
0
