-- Билигин Белоруссияҕа буола турар быһыы-майгы өрөспүүбүлүкэни эһэр сыаллаах ыытылла турар. Былааска талаһар Тихановская экэниэмикэҕэ да, бэлиитикэҕэ да тугу да этэр, биэрэр да, оҥорор да кыаҕа суох. Арай биир туруорсуулаах: "Барытын нэһилиэнньэ бас билиитигэр биэрэххэ", -- диэн. Биһиэхэ оруобуна итинник дьаһаныы буолбута. Сэбиэскэй Сойууска үлэлээн тигинээн турбут 80 000 тэрилтэни, 50 000 кэриҥэ хаһаайыстыбаны приватизациялаан баран ыспыттара, суох гыммыттара. Соннук урусхаллааһын Украинаҕа буола турар.
Онно тэҥнээтэххэ, дьиҥэр, Белоруссия оҥорон таһаарарын тутан олорбута. Хортуоппуйун, оҕуруотун аһын, "Белорус" тыраахтарын, "БеЛАЗ", «МЗКТ», "МАЗ" курдук улахан грузовойдарын, троллейбустарын, оптуобустарын атыылаан эргинэр. Оннооҕор ракета «Ярс» уонна «Тополь-М» тэлиэгэлэрэ эмиэ манна оҥоһуллаллар. Онон билигин Лукашенко дьаһалтатын кытта болуоссакка тахсыбакка, үлэ кэлэктииптэрин кэрийэн, өйдөтөр үлэни ыытара оруннаах. Бу тэрилтэлэр сабылыннахтарына, тыһыынчанан киһи үлэтэ суох хаалар. Утарылаһааччылар сорох оруннаах этиилэрин ылыныан, бэлитиичэскэй систиэмэлэригэр "өрөмүөн" ыытыллыан наада. Конституцияларыгар уларытыылары киллэрэллэрэ уолдьаста. Онто суох муна-тэнэ сылдьар норуоту "польскай-литовскай шляхта", "Украина бандеровецтара", уо.д.а. оҕуруктаах өйдөөхтөр салайан барыахтара.
Мин санаабар, РФ Бэрэсидьиэнэ Владимир Путин Арассыыйа куттала суох буолуутун сэбиэтин уонна парламент дьокутааттарын кытта Белоруссия боппуруоһугар мунньах тэрийэрэ сөптөөх. Тоҕо диэтэххэ, Белоруссияны "тоһуттахтарына", Арассыыйаҕа эмиэ улахан охсуулаах. Ельцин Бэрэсидьиэн эрдэҕинэ, 1999 с. Арассыыйа уонна Белоруссия куомуннаах (сойуустаһар) судаарыстабалар буоларга сөбүлэҥ түһэрсибиттэрэ. Онон бырааттыы дойдубут оннун-олоҕун буларыгар баҕарыаҕыҥ.
-
0
-
0
-
0
-
0
-
0
-
0
