Николаевскай ааҕыы 2007 с. төрүттэммитэ, онтон ыччат парламенын көҕүлээһининэн уонна Ил Түмэн, СӨ Бырабыыталыстыбатын өйөбүлүнэн сыл ахсын ыытыллар пуорумҥа кубулуйбута.
Бибилэтиэкэҕэ киирдэххэ, 1990-ус, 2000-сылларга Михаил Ефимович үлэлээн ааспыт эпохатын кэрэһиттэрэ ол кэми субу баардыы санаталлар. Кини «Азия оҕолоро» аан дойдутааҕы успуорт оонньууларын Дьокуускайга тэрийэн, «Туймаада» стадион, “Кыайыы 50 сыла” успуорт дыбарыаһа, «Эллэй Боотур”, “Чолбон”, Долгун” бассейн, “Модун”, “Дохсун”, “Триумф” о.д.а. успуорт баараҕай уораҕайдара тутуллубуттара. Өрөспүүбүлүкэ киин куоратыгар аан дойду араас куораттарыттан көтөн кэлэр ааллары көрсөр аныгы аэровокзал тутуллубута. Ыалдьыттары олохтуурга «Полярная звезда» гостиница дьэндэйэн тахсыбыта.
Арассыыйаны ол кэмҥэ салайан олорбут Бэрэсидьиэни Борис Ельцини кытта үтүө сыһыаннаах, өйдөһөр-өйөһөр буолан, сирбит барҕа баайыттан өлүүлэһэн, Мэдиссиинэ национальнай киинэ тутуллубута, каадырдары бэлэмниир департамент тэриллэн, оскуоланы бүтэрбит оҕолору дойду киин куораттарын престижнэй үрдүк үөрэх кыһаларыгар буор босхо үөрэттэрэр буолбута. Михаил Ефимович ити курдук норуотун туһугар оҥорбут үтүөтүн ааҕан сиппэккин.
22 улуустан 80-ча эдэр лиидэр
Кини эдэр ыччаты үөрэхтииргэ, аныгы кэм ирдэбилигэр эппиэттиир идэлэри баһылыылларыгар улахан болҕомтотун уурара, ол иһин Николаев-кииҥҥэ өрөспүүбүлүкэ 22 улууһуттан 80-ча эдэр лиидэр ылбычча мустубатылар. Тэрээһин кыттааччылара – нэһилиэктэр баһылыктара, муниципальнай тэрээһин баһылыгын солбуйааччылара, оскуола дириэктирдэрэ, тэрилтэ салайааччылара, урбаан бэрэстэбиитэллэрэ, кинилэр үгүстэрэ отуттарын да туола илик 25-28 саастаах эдэр дьон.
Пуорум сүрүн тиэмэтэ билиҥҥи быыһык кэмҥэ бүддьүөттэн кэлэр бэлэм харчыны күүтэн олорбокко, саҥа бырайыактары толкуйдаан таһааран, инвестицияны булан, бэйэ дохуотун оҥостуу, муниципалитеттар хааһыналарын байытыы, тыа хаһаайыстыбатын, урбаан оҥорон таһаарар бородууксуйатын сайыннарыы.
«Инникини түстүүр идиэйэлэр» III Николаевскай пуорум үөрүүлээх аһыллыытыгар Ил Түмэн Бэрэссэдээтэлэ Алексей Еремеев, РФ сенатора Егор Борисов, СӨ Бырабыыталыстыбатын бэрэссэдээтэлин солбуйааччы Георгий Степанов, Хаҥалас улууһун баһылыга Сергей Гребнев эдэр ыччакка эҕэрдэ тылларын эттилэр. Пуорумҥа Ил Түмэн Бэрэссэдээтэлин солбуйааччы Афанасий Владимиров, норуот дьокутааттара Антонина Григорьева, Георгий Балакшин кытыннылар.
Дойдубут устуоруйатын сэгэттэххэ
Алексей Еремеев пуорум саамай көхтөөх, инникигэ эрэллээх өрөспүүбүлүкэ эдэр лиидэрдэрин, төрөөбүт дойдуларын тупсарарга үгүс идиэйэлээх дьону түмэрин бэлиэтээтэ.
«Биһиги улуустарбытын сайыннарарга үһүс Николаевскай пуорум күүс-көмө буолуо. Пуорум былаһааккаларыгар, панельнай дискуссияларыгар, төгүрүк остуолларыгар инвестицияны хайдах буолуохха сөбүн, хомунаалынай хаһаайыстыба кэккэ кыһалҕаларын, бүддьүөтү хаҥатыы, үлэ миэстэтин тэрийии боппуруостарын ырытыахтара. Эдэр дьон олоҕу атыннык көрөрө, сонун идиэйэлэрэ, креативнай ньымалара бу барыта суолталаах», - диэн эттэ спикер.
Кини өрөспүүбүлүкэ сүбэринитиэтэ быйыл 35 сылын туолбут устуоруйата хайдах тиһиллибитин, дьокутааттар Төрүт сокуону хайдах ылыммыттарын Алексей Ильич устудьуоннуу сылдьан ону көрбүтүн, илэ бэйэтинэн кыттыспытын туһунан санаан ааста. Биһиги төрөппүттэрбит хайдах олорбуттарын, ол саҕана куорат дьиэтин улахан аҥаара мас тутуулааҕын, соҕотох аспаал суол Дьокуускай уонна Покровскай икки ардыгар эрэ баарын аҕынна. Улууска тахсар суол-иис мөлтөҕө, оскуолалар, уһуйааннар бары мас дьиэлээхтэрэ. Сирбит баайын барытын Сэбиэскэй Сойуус министиэристибэлэрэ дьаһайаллара.
Алмаастаах дойдуга олорон тыа дьоно оһохторун оттон, мастарын-муустарын бэлэмнээн, ыарахан үлэ бүппэт түбүгэр эриллэ сылдьалларын көрөн, Михаил Николаев айылҕа баайыттан киирэр үп-харчы өрөспүүбүлүкэ нэһилиэнньэтин олоҕун таһымын тупсарарга, социальнай эбийиэктэри тутарга туттуллуохтаах диэн туруорсубута.
Онтон Сэбиэскэй Сойуус ыһыллыбытын кэнниттэн өрөспүүбүлүкэ сүбэринитиэтин, Төрүт сокуонун, судаарыстыбаннаһын төрүттэспитэ. Москубаҕа тиийэн, национальнай өрөспүүбүлүкэлэри түмэ тардан, дойдубут ыһыллыбатын туһугар бары бииргэ түмсүөхтээхпит диэн тылын ылыннаран, саҥа модун Арассыыйа састаабыгар федеративнай дуогабары түһэрсибитэ.
Алексей Ильич өрөспүүбүлүкэ бүддьүөтүн чиэппэрин хааччыйан олорор «АЛРОСА” хампаанньа хайдах төрүттэммитин, аахсыйатын үллэриини, Михаил Николаев Сахабыт Сирин нэһилиэнньэтин олоҕун уйгутун тупсарарга оҥорбут килбиэннээх үлэтин, кини өрөспүүбүлүкэни салайар кэмигэр ыччат миниистиринэн үлэлээбитин, Бастакы Бэрэсидьиэммит күн сириттэн барыар диэри куруук ыҥыран кэпсэтэрин, сүбэ-ама биэрэрин туһунан эдэр дьоҥҥо кэпсээтэ.
Ол туһунан сиһилии "Ил Түмэн" хаһыакка ааҕыҥ.
-
0
-
0
-
0
-
0
-
0
-
0
