Ону таһынан судаарыстыбаннай бырагыраамаларга үп-харчы тиийбэтин, мунньуллубут иэһи-күүһү быйылгы бүддьүөт харчытынан сабар төһө сөптөөҕүн, хоруупсуйаҕа хас дуоһунастаах киһи түбэспитин, хапытаалынай өрөмүөҥҥэ үтүмэннээх үп-харчы төлөнөр эрээри, олохтоохтор дьиэлэрин өрөмүөнүгэр харчыны кэмигэр кыайан ылбаттарын туһунан туоһуластылар, кэккэ ыйытыктарга санааларын үллэһиннилэр.
Норуот дьокутаата Владимир Федоров үбү-харчыны хонтуруоллааһын үлэтин сэмэлээтэ, сүүһүнэн миллиард үбү бэрэбиэркэлииллэр эрээри, холуобунай дьыала көбүтүллэрэ олох кыратын, үбү-харчыны туттууга тахсар кэһии кыччаабатын, дуоһунастаах дьон тус эппиэтинэһи сүкпэттэрин бэлиэтээтэ. Онон үбү-харчыны бэрэбиэркэлээһин аат эрэ харата оҥоһулларын аҕынна.
Норуот дьокутаата Виктор Федоров уопсайа 9,9 млрд. солк. кэһии баарыттан бүддьүөккэ 32,3 мөл. солк. ол аата үп 0,3% төнүннэрбиттэрин туһунан эттэ. Итиниэхэ олоҕуран, кини хас бэрэбиэркэ оҥоһуллубутунан буолбакка, төһө харчы төнүннэриллибитин көрүүгэ көһөргө ыҥырда. Бүддьүөт үбүн-харчытын туттууга улахан кэһиигэ тус эппиэтинэс баар буолуохтааҕын, Счетнай балаата отчуотун көннөрү истэн кэбиспэккэ, салайар үлэҕэ туттар наадалааҕын бэлиэтээтэ.
Алена Федорова дьокутааттар этиилэрин 2026 с. үлэҕэ эбии сорук быһыытынан ылынарын этэн туран, тэрилтэ аудитордара министиэристибэлэри, бырабыыталыстыбаны кытта быһаччы үлэлэһэллэрин туһунан иһитиннэрдэ.
Ил Түмэн бэрэссэдээтэлэ Алексей Еремеев Счетнай балаата бүддьүөтү ылыныыга сыаналаах аналитиканан хааччыйарын бэлиэтээн туран, казначейскай уонна үп боломуочуйатын муниципалитеттарга биэрии боппуруоһа көрүллүөхтээҕин эттэ. Кэккэ улуустарга, чуолаан Аартыкаҕа тыа сиригэр буҕаалтырдар, хонтуруоллуур-ааҕар уорганнар суохтарыттан үп-харчы үлэтэ доҕолоҥнуур эбит. Ол иһин бэс ыйыгар диэри сокуон барылын бэлэмнииргэ, СӨ Үбүн министиэристибэтин иһинэн улуустарга үп-хааһына управлениетын сөргүтэргэ сорудахтаата.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
