“Сыл бүтүүтэ быдан мөкү түмүктэри күүппүппүт. Ол гынан баран, хамсык барыбытын сомоҕолоото, ол түмүгэр сүрүн соруктарга күүскэ ылыстыбыт. Онон өрөспүүбүлүкэ бары суолталаах сыаллара-соруктара кэмигэр ситиһилиннилэр: бүддьүөт эбэһээтилэстэбэлэрин, национальнай бырагыраамалары бүтүннүү толордубут. Эрэгийиэннэр икки ардыларынааҕы рейтиҥҥэ 20 бастыҥ иһигэр киирдибит”, – диэн Андрей Тарасенко отчуоттаата.
Премьер миниистир федеральнай уонна өрөспүүбүлүкэтээҕи бүддьүөттэн эбии үбүлээһин көрүллэн, хамсык тыҥаан турар кэмигэр доруобуйа харыстабылын тэрилтэлэрэ кэмигэр тустаах медицинскэй тэриллэринэн уонна эминэн хааччыллыбыттара диэтэ. Санавиация тохтоло суох үлэтэ сөптөөхтүк тэриллибитэ диэн эттэ. Эмчиттэр уонна социальнай үлэһиттэр эбии төлөбүр ыллылар диэн иһитиннэрдэ.
“Арассыыйа бырабыыталыстыбатын социальнай өйөбүлүн миэрэлэрэ, ол иһигэр үлэтэ суохтар босуобуйаларын үрдэтии, оҕолоох ыалларга ыйдааҕы төлөбүрдэри анааһын, кириисис охсуутун сымнаттылар. Оҕолоох ыаллар уонна үлэтэ суохтар уопсайа 9 млрд солк. кээмэйдээх көмө ыллылар”, – диэн бэлиэтээтэ.
Андрей Тарасенко кыра уонна дьоҕус урбаан өйөбүлүгэр 2 млрд солк. кэриҥэ үп-харчы көрүллүбүтүн эттэ. Өрөспүүбүлүкэ тутаах тэрилтэлэрэ чэпчэтиилээх кирэдьиит, субсидия, судаарыстыбаннай мэктиэ уонна нолуок төлөбүтүн болдьоҕун уһатыы курдук миэрэлэр нөҥүө 7 млрд солк. суумалаах көмөнөн туһаммыттарын бэлиэтээтэ.
“2020 сылга “Соҕуруу Саха сирэ” диэн баараҕай бырайыак олоххо киирдэ. Ол курдук, таас чоҕу хостуур уонна таҥастыыр “Соҕуруу Саха сирэ” урутаан сайдар түөлбэ үлэтин саҕалаата. Бу бырайыак өрөспүүбүлүкэ бүтүннүүтүн социальнай-экэнэмиичэскэй сайдыытыгар сабыдыаллыаҕа. Маны таһынан, Аартыка улуустарын сайдыытыгар дьоһуннаах хамсааһыннар таҕыстылар. Аартыка түөлбэтин сайдыытын стратегията бигэргэнэн номнуо олоххо киирэн саҕалаата”, – диэн Андрей Тарасенко кэпсээтэ.
Кини Хотугу эргимтэҕэ оптоволокно утаҕа киирбитин, солбудаһык (альтернативнай) эниэргийэни туһаныы сайдан эрэрин, “Эдэр табаһыт” уонна “Аартыка учуутала” бырайыактар олоххо киирбиттэрин эттэ.
“Жатай бөһүөлэгэ бүтүн Арассыыйаҕа аан бастакынан хаарбах дьиэтэ-уота суох нэһилиэнньэлээх пуунунан буолла. Өрөспүүбүлүкэ “Сыыппара эрэгийиэнэ” ааты ылла. Өрөспүүбүлүкэҕэ Дойдуга бэриниилээх буолуу сыла үрдүк таһымнаахтык ааста”, – диэн премьер миниистир бэлиэтээтэ уонна өрөспүүбүлүкэ олохтоохторун баһыйар аҥаардара бэлиэ сыл сүрүн тэрээһиннэригэр, аахсыйаларыгар бар көхтөөхтүк кыттыбыттарын санатта.
СИА матырыйаалынан.
-
0
-
0
-
0
-
0
-
0
-
0
