Мунньах иннинэ кыттааччылар Нам сэлиэнньэгэр байыаннай дьайыы бэтэрээннэрин искибиэригэр баар байыаннай дьайыы кыттыылаахтарыгар анаммыт пааматынньыкка сибэкки дьөрбөтүн ууран буойуннары кэриэстээтилэр.
Тэрээһини Ил Түмэн Бэрэссэдээтэлэ Алексей Еремеев маннык тылларынан арыйда:
«Ил Дархан Айсен Николаев ыйааҕынан олохтоммут Аҕа дойду Улуу сэриитин кэнниттэн буолбут бойобуой дьайыы кыттыылаахтарын күннэрин бүгүн бэлиэтиибит. Кэммит билигин уустук: урукку ССРС сиригэр-уотугар анал байыаннай дьайыы буолуо диэн түһээн да баттаппатахпыт. Биһиги дьоруойдарбыт Афганистан, Чечня сэриилэригэр уонна билигин анал операцияҕа кыттыбыттара. Хорсун санааларын ууран Дойдубут туһугар охсуспуттарын иһин кинилэргэ махтанабыт. Биһиги сүрүн сыалбыт – кинилэр социальнай адаптацияларыгар уонна ыччаты патриотическай иитиигэ усулуобуйаны тэрийии».
Мунньах сүрүн чааһыгар үс боппуруос көрүллүбүтэ.
Бастаан Саха Өрөспүүбүлүкэтигэр ОДьКХ туругун ырыттылар. Дакылааты Ил Түмэн тутууга, олох-дьаһах хомунаалынай хаһаайыстыбаҕа уонна энэргиэтикэҕэ кэмитиэтин бэрэссэдээтэлэ Александр Корякин оҥордо. Кини субсидия үбүлээһинин хонтуруоллуур, эниэргийэни харыстыыр миэрэлэри оҥорор уонна учуоттуур тэриллэри туруоран түмүктүүр наадатын ыйда. Муниципалитеттары сылааһынан уонна уунан хааччыйыы исхиэмэлэрин саҥардыыга сүбэлэр эмиэ бэрилиннилэр.
Салгыы Муниципальнай тэриллиилэр бэрэстэбиитэллээх уорганнарын дьокутааттарын III сийиэһигэр бэлэмнэнии туһунан дьүүллэһии буолла. Онуоха Ил Түмэн судаарыстыбаннай тутулга уонна сокуону оҥорууга кэмитиэтин бэрэссэдээтэлэ Афанасий Владимиров 2025 сыл ахсынньытыгар сийиэс Дьокуускайга ыытыллара былааннанарын биллэрдэ. Кини муниципальнай тэриллиилэргэ каадыр систиэмэтин бөҕөргөтөр наадалааҕын бэлиэтээтэ.
Түмүктүүр боппуруоһунан «Публичнай былаас ньыгыл тиһигэр олохтоох салайыныы уопсай бириинсиптэрин туһунан» 33 №-дээх федеральнай сокуону уонна Саха сиригэр олохтоох салайыныы тиһигэр уларыйыылары дьүүллэстилэр. Олохтоох салайыныы кэмитиэтин бэрэссэдээтэлэ Владимир Прокопьев 2027 сылга олоххо киириэхтээх сокуон саҥа балаһыанньаларын туһунан эттэ. Ол курдук, сокуон өрөспүүбүлүкэҕэ олохтоох салайыныы икки таһымнаах систиэмэтин харыстыырын, былаас уорганнарын тэрийии бэрээдэгэр уларыйыылары уонна 2025 сыл бүтүөр диэри эрэгийиэннээҕи сокуон ылыныллыахтааҕын бэлиэтээтэ.
Алексей Еремеев мунньаҕы түмүктүүрүгэр, миэстэтигэр үлэ улахан суолталааҕын тоһоҕолоон эттэ:
«Муниципальнай реформа – биһиги өр кэтэспит сокуоммут, бэрэсидьиэммит илии баттаабыт докумуона буолар. Бүгүн биһиги судаарыстыба өттүттэн кыһамньылаах үлэни уонна чопчу быһаарыылары ирдиир сүрүн боппуруостары ырыттыбыт».
Кыттааччылар олохтоох салайыныы көдьүүһүн үрдэтэргэ салгыы бииргэ үлэлээһин наадалааҕын бэлиэтээтилэр.
Ил Түмэн пресс-сулууспата
Хаартыскаҕа Василий Кононов (Ил Түмэн) түһэриилэрэ
-
2
-
0
-
0
-
0
-
0
-
0
