Тэрээһин Ил Түмэн бэрэссэдээтэлэ Алексей Еремеев тус сорудаҕынан ыытылынна, мунньаҕы бүддьүөкэ, үпкэ, түһээн уонна сыана бэлиитикэтигэр, бас билии уонна приватизация боппуростарыгар сис кэмитиэт бэрэссэдээтэлэ Юрий Николаев салайда.
Нэһилиэнньэлээх пууннары уонна дьон олоҕун хааччыйар, экэниэмикэ эбиэйиэктэрин чөлүгэр түһэрии, ону тэҥэ эмсэҕэлээбиттэргэ тус көмөнү оҥоруу билигин сүрүн соругунан буоларын эттилэр. Онон инникитин норуот дьокутааттара салайар, үлэлиир тэрилтэлэриттэн харчынан көмөнү хомуйууну күүһүрдэргэ быһаардылар. Хомуллубут үбү “Өймөкөөн оройуона” МТ социальнай-экэнэмиичэскэй сайдыытыгар туһуламмыт анал Пуондаҕа ыытарга диэн чопчулаатылар.
Сис кэмитиэт бэрэссэдээтэлэ бэлиэтээбитинэн, өрөспүүбүлүкэ улахан, кыахтаах тэрилтэлэрэ пуонда туолуутугар көхтөөхтүк кыттыылара уонна улуустар дьаһалталарын кытта көмөнү ханнык-хайдах хайысханан сүрүннээһин ураты суолталаах буолуоҕа. Ордук болҕомтону биирдиилээн дьоҥҥо – эмсэҕэлээбит кыраасданнарга ууран, көмөнү чопчу кинилэргэ оҥорор туһунан эттэ.
“Көмөнү оҥорорбутугар ситимнэммит, бэрээдэктэммит тиһиги оҥоруохтаахпыт – ол сүрүн түмүкпүт буолуоҕа. Ону ситистэхпитинэ, эмсэҕэлээбит улуустары көдьүүстээхтик өйүөхпүт уонна салгыы үлэлииргэ бигэ тирэх, көҕүлээһин да быһыытынан туһаныахпыт”, -диэн Юрий Николаев норуот дьокутааттарыгар сүрүн хайысханы билиһиннэрдэ.
Хомуллубут үбү сөптөөхтүк туттууну, туһаныыны норуот дьокутааттара Гаврил Алексеев уонна Евгений Слепцов ылыннылар. Маннык тэринии үлэ хайдах ыытылларын дьэҥкэтик уонна көдьүүстээхтик көрдөрөргө туһалыаҕа.
Мунньах кэмигэр норуот итэҕэллээхтэрэ ханнык баартыйаҕа туралларын аахсыбакка, көмөнү кэмигэр оҥорууга бары сомоҕолоһон биир быһаарыныы ылыннылар. Култуураҕа уонна киэҥник иһитиннэрэр-биллэрэр сириэстибэлэргэ сис кэмитиэт бэрэссэдээтэлэ Виктор Губарев сайыҥҥы халаантан чөлүгэр түһэрии үлэлэрин биир кэлимник быһаарарга парламент истиилэрин ыытарга этии киллэрдэ. Биллэрин курдук, Ил Дархан Айсен Николаев бу дьыл от ыйын 18 күнүгэр эрэгийиэннээҕи ЫБМ биллэрэр туһунан 664№-дээх Ыйааҕа тахсыбыта. СӨ Бырабыыталыстыбатыгар халаан уутугар эмсэҕэлээбит улуустары чөлүгэр түһэриигэ анал хамыыһыйа тэриллибитэ, кини састаабыгар норуот дьокутааттара киирбиттэрэ.
Дьокутаат Гаврил Алексеев халаан ыараханнык, алдьатыылаахтык ааста, ордук Өймөкөөн улууһа оҕустарда диэн эттэ. Билигин суол-иис чөлүгэр түһэрилиннэ, ол гынан баран тыа хаһаайыстыбатыгар олус улахан хоромньу таҕыста – хотоннор ууга бардылар, сорохтор туох да докумуоннара суох диэн бу хайысхаҕа болҕомтону уурарга ыҥырда. Норуот дьокутааттарыттан уонна тэрилтэлэртэн киирэр көмөнү пуондаҕа кииннээн, салгыы сөптөөхтүк көрөн, дьиэлэрэ-уоттара ханна да эрэгэстэрээссийэлэммэтэх эмсэҕэлээбит дьоҥҥо көмө быһыытынан туттуохха сөбүн ыйда. Ол курдук, маннык дьоҥҥо судаарыстыба көмөтө хайдах да барыларыгар тиийбэтин санатта.
Өймөкөөн-Халыма быыбардыыр уокуруктан дьокутаат Евгений Слепцов улуустарга халаан уута хайалартан халыйан кэлиитигэр миэстэтигэр биир бастакынан тиийэн, ууну ортотунан сылдьан быыһыыр үлэлэргэ кыттыспыта. Кини бырабыыталыстыба билигин дьиэлэрэ-уоттара ууга барбыттарга социальнай көмөнү оҥорорго үлэлэһэрин санатта уонна бары эмсэҕэлээбит эбийиэктэри кэрийэн бэрэбиэркэлииргэ ыҥырда, ол иһигэр аҕам саастаах, соҕотох кырдьаҕастар олорор эргэ дьиэлэрин хабан туран. “Халаан улахан хоромньуну таһаарда. Кылгас кэм иһигэр чөлүгэр түһэрэн, дьоммут-сэргэбит киһилии олорор, үлэлиир усулуобуйаларын тэрийиэхпитин наада”, - диэн кэллиэгэлэригэр туһаайда.
“Саҥа дьон” баартыйаттан дьокутаат Василий Николаев уустук кэмҥэ норуот итэҕэллээхтэрэ сомоҕолоһон, бэйэ бэйэни өйөнсөллөрө үчүгэй, суолталаах диэтэ. Ону тэҥэ кэлэктиибинэн көмөнү оҥорор ордук көдьүүстээх, дьайымтыа буолар диэн бары көҕүлээһиннэри өйүүрүн биллэрдэ.
Мунньахха кыттыбыт дьокутааттар 2025 сыл бүддьүөтүн көннөрүү кэмигэр уонна 2026 сыллааҕы, 2027-2028 сс. былааннаах кэмҥэ
судаарыстыбаннай бүддьүөтү көрүүгэ сайыҥҥы халаан кэмигэр тахсыбыт хоромньуну чөлүгэр түһэриигэ үбү-харчыны тыырар наадатын бэлиэтээтилэр, ол иһигэр олорор дьиэлэри уонна тыа хаһаайыстыбатын эбийиэктэрин өрөмүөннээһиҥҥэ. Сүөһү аһылыгын бэлэмнээһиҥҥэ ураты болҕомто ууруллуоҕа. Ону тэҥэ алдьаммыт суол-ииһи чөлүгэр түһэрии салҕаныаҕа.
Саха Өрөспүүбүлүкэтин парламена сайыҥҥы халаан уутуттан эмсэҕэлээбит улуустарга чөлүгэр түһэрии үлэлэрэ хайдах ыытыллан иһэллэрин уонна нэһилиэнньэҕэ көмө оҥоһууллуутун боппуруостарын хонтуруолга тутар.
Ил Түмэн пресс-сулууспата
Василий Кононов хаартыскаҕа түһэриитэ
-
0
-
0
-
0
-
0
-
0
-
0
