Күндү биһиги кэрэ аҥаардарбыт!
Саха Өрөспүүбүлүкэтин Ил Түмэнин аатыттан уонна тус бэйэм Аан дойду дьахталларын күнүнэн ис сүрэхпиттэн эҕэрдэлиибин!
Дьахтар киһи аймах тэҥ бырааптаах буолуутун туруулаһар бэлиэтин быһыытынан үөскээбит бырааһынньыгы биһиги сааскы бастакы бырааһынньыгынан ылынабыт уонна бу күҥҥэ күн күбэй ийэлэрбитигэр, тапталлаах кэргэттэрбитигэр, эйэҕэс эдьиийдэрбитигэр уонна кыталык кыргыттарбытыгар сүрэхпитин аһабыт, истиҥ сыһыаммытын биллэрэбит.
Биһиги кэрэ аҥаардарбыт дьиэ кэргэн уонна бүтүн норуот үтүө үгэстэрин үксэтиигэ уонна үйэтитиигэ киллэрбит кылааттара тугунан да кэмнэммэт. Ол курдук, Саха сирин судаарыстыбаннаһын сайдыытыгар сүҥкэн үтүөлээх, төрөөбүт өрөспүүбүлүкэлэригэр олох уйгута тупсарын, норуоттар икки ардыларыгар эйэни уонна доҕордоһууну бөҕөргөтүүгэ, кэлэр көлүөнэ инники кэскилин туһугар олохторун анаабыт дьахталлар аҕыйаҕа суохтар. Кинилэр ортолоруттан Өлүөхүмэ улууһугар бастакы холкуоһу төрүттэспит, өрөспүүбүлүкэҕэ социальнай хааччыйыы бастакы дьахтар-миниистирэ, Саха АССР Үрдүкү Сэбиэтин Президиумун бэрэссэдээтэлэ Мария Дмитриевна Нартахова, өрөспүүбүлүкэҕэ дьахтар хамсааһынын сайдыытыгар олук уурбут, нэһилиэнньэ ортотугар сырдатар үлэни, сэбиэскэй тутуу куурсун саҕалаабыт, 1963-1979 сылларга Саха АССР Үрдүкү Сэбиэтин Президиумун бэрэссэдээтэлинэн үлэлээбит Александра Яковлевна Овчинникова, «Саха Арктикатын чулуу кыыһа» Евдокия Николаевна Горохова, Аҕа дойду Улуу сэриитин, сут-кураан дьылларыгар, итиэннэ Сталин ирдэбиллээх салалтатын кэмигэр өрөспүүбүлүкэни салайбыт Софья Петровна Сидорова ааттарынан киэн туттабыт.
Дьахтар – олоҕу биэрээччи, олоҕу салҕааччы, кэрэҕэ-үтүөҕэ угуйааччы, үөрэххэ, сайдыыга уһуйааччы. Бу күн кэнчээри ыччаты үөрэтэ-такайа сылдьар күндү кэрэ аҥаардарбытыгар түбүктээх үлэҕит, тулхадыйбат тулуургут, ыллыктаах санааҕыт уонна иһирэх тапталгыт иһин махтал истиҥ тылларын этэбит.
Күндү биһиги кэрэ аҥаардарбыт! Эһиги ыарахантан чаҕыйбат күүстээх санааҕытынан, кэскиллээҕи түстүүр айылгыгытынан, дьиэ кэргэн бигэ буолуутугар, өрөспүүбүлүкэ уонна дойду инники сайдыытын туһугар үлүскэннээх үлэҕитинэн биһигини – эр дьону сөхтөрөҕүт.
Куруутун чөл туруктаах сылдьыҥ, үгүстүк үөрүҥ-көтүҥ, ситиһиилээх буолуҥ! Дьиэ кэргэҥҥитигэр, чугас дьоҥҥутугар сир үрдүгэр баар бары үчүгэйи баҕарабын!
Саха Өрөспүүбүлүкэтин Ил Түмэнин Бэрэссэдээтэлэ П.В.Гоголев
-
0
-
0
-
0
-
0
-
0
-
0
