Бүгүҥҥү кыһалҕалар
Мунньах саҕаланыытыгар Мария Николаевна пандемия кэмигэр СМИ эйгэтигэр үөскээбит кыһалҕалары кытта кылгастык билиһиннэрдэ. Ол курдук, эрэкэлээмэттэн киирэр дохуот, хаһыакка уонна сурунаалга сурутуу биллэ түспүттэрин бэлиэтээтэ. Ону сэргэ, судаарыстыбаттан көрүллэр өйөбүллэр тустарынан кэпсээтэ. Пандемия уһаан-кэҥээн бардаҕына, кэлэр 2021 сылга кыһалҕалар өссө дириҥиир чинчилээхтэрин эттэ.
Инновация миниистирэ Анатолий Семенов төгүрүк остуол кыттыылаахтарын сыыппаралааһын үлэтин сүрүн түмүктэрин кытта билиһиннэрдэ. Ону таһынан, пандемия кэмигэр СМИ эйгэтин өйүүргэ туох үлэ-хамнас ыытыллыбытын кэпсээтэ.
Төгүрүк остуол үлэтин кэмигэр үгүс этии уонна боппуруос киирдэ. Холобур, Ил Түмэн бэрэссэдээтэлин солбуйааччы Антонина Григорьева СМИ үлэһиттэрин хамнаһын култуура үлэһиттэрин хамнаһыгар тэҥниир наадалааҕын туһунан этии киллэрдэ.
“В Якутии.ру” интернет хаһыат эрэдээктэрэ Елена Тихонова уонна “ТВ” ХЭУо салайааччыта Олег Желнин эһиилги сылга СМИ эйгэтин үбүлээһинин туһунан ыйыттылар. Онно үп миниистирэ Валерий Жондоров: “Быйыл 1 млрд 289 мөл солк көрүллүбүтэ. Эһиил бүддьүөт өссө кырыымчык буолара сабаҕаланар. Онон 2021 сыллааҕы үбүлээһин өссө аччыгый буолуо”, – диэн хоруйдаата.
“Бичик” кинигэ кыһатын дириэктэрэ Август Егоров кинигэ таһаарыытын өйүүр наадалааҕын эттэ.
– Урут сыллата кинигэ таһаарыытыгар 16 мөл солк субсидия көрүллэр этэ. Ол кээмэйэ кэлин 2-3 төгүл сарбылынна. Ону кэлэр сылларга чөлүгэр түһэрэр кыах баар дуо? САССР 100 сыллаах үбүлүөйүн көрсө элбэх былааннаахпыт, – диэн кэпсээтэ. Миниистир Анатолий Семенов ити боппуруос үбүлээһинин култуура министиэристибэтин кытта дьүүллэһиэх буолла.
Норуот дьокутаата Павел Ксенофонтов былырыын Ил Түмэн Судаарыстыбаннай Мунньаҕынан бигэргэммит “Судаарыстыбаннай тыллары харыстааһын уонна сайыннарыы” бырагыраамаҕа “Бичик”, “Кэскил” кыһалара, “Саха” НКИХ киириэхтэрин сөбүн эттэ. Ону таһынан, бырагыраама чэрчитинэн үөрэх министиэристибэтэ (бырагырааманы сүрүннүүр уорган) 2020 сылга туох үлэни-хамнаһы ыыппытын уонна 2021 сылга тугу былаанныырын Ил Түмэн Судаарыстыбаннай Мунньаҕар отчуоттуохтааҕын туһунан этиини боротокуолга киллэрэллэригэр көрдөстө.
“Сахабэчээт” тэрилтэ дириэктэрэ Ньургуйаана Стручкова сайдыыга үбүлээһин тиийбэтигэр тохтоото:
– Үбүлээһин 80 % хамнас уонна нолуок төлөбүрүгэр барар. Хаалбыт 20 % коммунальнай төлөбүрдэргэ эрэ тиийэр. Тэрилтэ салгыы сайдарыгар үп-харчы ордубат”, – диэтэ уонна: “СМИ уонна бэчээт үлэһиттэрин хамнаһын инникитин култуура үлэһитин хамнаһыгар тэҥниир олус сиэрдээх буолуо этэ. Билигин испэсэлиистэрбит бары култуура эйгэтигэр көһөн эрэллэр. Ону сэргэ Арктика улуустарын СМИ-лэрин өйүөххэ наада, – диэн санаатын үллэһиннэ.
Инновация миниистирэ Анатолий Семенов тутулуга суох СМИ-лэри өйүүргэ сыллата 35 мөл солк көрүллэрин кэпсээтэ. Ону таһынан быйыл 15 мөл солк суумалаах Ил Дархан граннара анаммыттарын иһитиннэрдэ. Санатан эттэххэ, тутулуга суох СМИ-лэргэ Ил Дархан граннара былырыын тохтуу сылдьыбыттара. Быйыл өйөбүл хаттаан сөргүтүлүннэ. Миниистир эһиил грант уопсай суумата 30 мөл солк буолуо диэн бэлиэтээтэ. Онон граҥҥа өссө элбэх СМИ тиксэрэ былааннанар.
Төгүрүк остуолу түмүктээри туран, Мария Николаевна Христофорова инновация миниистирин иһинэн, үтүө үгэскэ кубулуйбут, эрэдээктэрдэр кулууптарын үлэтин салгыы сөргүтэр наадалааҕын туһунан эттэ. Мунньах кыттыылаахтара бары маннык таһымнаах кэпсэтии мэлдьи буоларыгар баҕа санаалаахтарын биллэрдилэр.
- 0
- 0
- 0
- 0
- 0
- 0