Мунньахха норуот дьокутааттара, сис кэмитиэт чилиэттэрэ Оксана Михайлова, Валерий Лютый, Нюргуяна Захарова, Наталья Румянцева, Роза Солнышкина, үп миниистирэ Валерий Жондоров, үлэ уонна социальнай сайдыы миниистирэ Елена Волкова, министиэристибэлэр уонна тэрилтэлэр бэрэстэбиитэллэрэ, Саха сирин Счетнай палаататын аудитордара, Ил Түмэн үлэһиттэрэ кыттыыны ыллылар.
Үп миниистирэ Валерий Жондоров Саха Өрөспүүбүлүкэтин 2021 сыллааҕы бүддьүөтүн уонна 2022-2023 сс. барылын кытта билиһиннэрдэ.
Мунньах кэмигэр үп миниистиригэр элбэх боппуруос киирдэ. Ол курдук, Алена Атласова 2021 сылга өрөспүүбүлүкэ оҕолоох ыалларын өйөбүлүн кээмэйэ 1 млрд. 264 мөл. 154 тыһ. солк. көҕүрээбитин ыйда уонна эһиилги сылга оҕолоох ыалларга туох өйөбүллэр көрүллүбүттэрин ыйытта.
Миниистир билиҥҥи дохуоту ааҕыы уонна үллэрии түмүгэр итинник сыыппара тахсыбытын эттэ. Ол гынан баран, федеральнай бүддьүөттэн эбии 9 млрд. солк көрүллүөхтээҕин бэлиэтээтэ. Оччоҕо өйөбүл кээмэйэ уларыйыа диэтэ.
Норуот дьокутаата Валерий Лютый элбэх оҕолоох ыалларга бэриллибит сир учаастактарыгар инфраструктураны сайыннарыы кыһалҕатыгар бэйэтин санаатын үллэһиннэ.
Оксана Михайлова 5-тэн элбэх оҕолоох ыалларга олорор усулуобуйаларын тупсаралларыгар эһиилги бүддьүөккэ үп-харчы көрүллүбэтэҕин бэлиэтээтэ. Норуот дьокутаата элбэх оҕолоох ыаллары уонна тулаайахтары өйөөһүн ханнык да түгэҥҥэ сарбыллара сатамматын эттэ.
Норуот дьокутаата Иван Данилов 3-гэр диэри саастаах оҕолоох кыаммат ыаллары босхо аһылыгынан хааччыйыы боппуруоһугар тохтоото.
Маны таһынан, мунньах кыттыылаахтара сокуоннай саастарын ситэ илик оҕолор буруйу оҥорууларын аччатарга туһуламмыт миэрэлэр үбүлээһиннэрэ сарбыллыытыгар, о.д.а. социальнай хабааннаах боппуруостарга болҕомтолорун уурдулар.
Мунньах түмүгүнэн, Ил Түмэн Судаарыстыбаннай Мунньаҕын дьиэ кэргэҥҥэ уонна оҕоҕо сис кэмитиэтэ 2021 сыллаах бүддьүөт бырайыагын өйүүрүн биллэрдэ, ол эрээри кэмитиэт этиилэрэ учуоттаныллыахтаахтар диэн усулуобуйалаах.
-
0
-
0
-
0
-
0
-
0
-
0
