Ол курдук, социальнай ырааҕы тутуһар сыалтан норуот дьокутааттара Мунньахтыыр саалаҕа, Аччыгый саалаҕа уонна Ил Түмэн хосторунан олорон мунньахха кыттыахтара.
Пленарнай мунньах кэмигэр норуот дьокутааттара кистэлэҥ куоластааһынынан мировой суудьуйалары талыахтара, Саха Өрөспүүбүлүкэтин Ил Дарханыгар бырабыытылыстыба бэрэссэдээтэлин уонна чилиэттэрин бигэргэтэригэр сөбүлэҥ биэриэхтэрэ. Норуот дьокутааттара куоластааһын уурунатыгар анал кыраапыгынан кэлэн куоластыахтара. Мировой суудьуйалар дуоһунастарыгар хандьыдааттар видео-кэмпириэнсийэ көмөтүнэн мунньах кыттыылаахтарын кытта сибээскэ тахсыахтара.
Сэтинньи 2 күнүнээҕи былаанныыр мунньах кэмигэр Петр Гоголев сис кэмитиэттэр бэрэссэдээтэллэригэр уочараттаах пленарнай мунньах бэбиэскэтин боппуруостарын бэлэмнииллэригэр сорудахтаата. Ону сэргэ, гражданнары кытта ыраахтан олорон көрсүһүүлэр, ахсынньы ый иккис аҥаарыгар быыбардыыр уокуруктарга командировкалар былааннарын билиһиннэрэллэригэр этии киллэрдэ.
Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлигэр Андрей Находкиҥҥа “Тыа хаһаайыстыбатынан дьарыктанарга аналлаах сирдэри салайыы боппуруостарын сайыннарыыга” туһуламмыт парламентскай истиини бэлэмнииригэр сорудахтаата.
Ил Түмэн билимҥэ, үөрэххэ, култуураҕа, иһитиннэриилэри киэҥник тарҕатар сириэстибэлэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева Саха сирэ көҕүлээбит “Аартыка оҕолоро” туспа алын бырагырааманы федеральнай былаас уорганнарын кытта сайыннарарга салгыы үлэлэһэрин иһитиннэрдэ.
Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Владимир Прокопьевка Ил Түмэн Судаарыстыбаннай Мунньаҕа уонна Иркутскай уобалас Сокуону Оҥорор Мунньаҕа Өлүөнэ өрүс көмүскэлигэр аналлаах кыттыгас мунньахтарын күнүн-дьылын уонна көрүҥүн чопчулууругар, бэлэмнииригэр сорудахтаата.
Маны таһынан, Ил Түмэн Бэрэссэдээтэлэ сис кэмитиэттэр уонна хамыыһыйалар 2021 сыллааҕы үлэлэрин былаанын барылын оҥорон эрдэттэн билиһиннэрэллэригэр соруйда.
-
0
-
0
-
0
-
0
-
0
-
0
