“Төгүрүк остуол” үлэтигэр Ил Түмэн Судаарыстыбаннай Мунньаҕын тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин, норуот дьокутааттара Руслан Федотов, Петр Аммосов, Родион Зорин, Оксана Михайлова, Иван Слепцов, СӨ бырабыыталыстыбатын бэрэссэдээтэлин солбуйааччы Михаил Никифоров, тыа хаһаайыстыбатын миниистирэ Александр Атласов, ситэриилээх былаас уорганнарын салайааччылара, Хаҥалас, Мэҥэ Хаҥалас, Нам, Сунтаар, Өлүөхүмэ, Үөһээ Бүлүү улуустарын уонна нэһилиэктэрин баһылыктара, Дьокуускайдааҕы тыа хаһаайыстыбатын билим чинчийэр үнүстүүтүн дириэктэрэ Леонид Владимиров, “Холбос” потребхолбоһук Сэбиэтин бэрэссэдээтэлэ Петр Мишкин, бааһынай хаһаайыстыбалар баһылыктара, кэтэх хаһаайыстыбалар, о.д.а. кытыннылар. Уопсайа быһа холбонуу көрүҥүнэн буолбут мунньахха 100-тэн тахса киһи кыттыста. Мунньаҕы норуот дьокутаата, Ил Түмэн тыа сиригэр уонна аграрнай бэлиитикэҕэ сис кэмитиэтин чилиэнэ Мария Христофорова салайан ыытта.
“Төгүрүк остуол” кыттыылаахтара Ил Түмэн XXI пленарнай мунньаҕар бастакы ааҕыыны ааспыт “СӨ бэйэни салайыныы уорганнарыгар тыа хаһаайыстыбатын өйөбүлүн кэккэ боломуочуйаларын биэрии” туһунан сокуон барылын уонна тыа хаһаайыстыбатын потребительскай кэпэрэтииптэригэр судаарыстыбаннай өйөбүлү оҥоруу боппуруостарын дьүүллэстилэр.
Мунньах саҕаланыытыгар сис кэмитиэт бэрэссэдээтэлэ Андрей Находкин тыа хаһаайыстыбатын кыһалҕаларын аһаҕастык ырытыы үтүө үгэскэ кубулуйбутун бэлиэтээтэ.
– “Төгүрүк остуол” үлэтин кэмигэр сиэрдээх этиилэри күүтэбит. Маны инникитин Ил Түмэн Судаарыстыбаннай Мунньаҕа тыа хаһаайыстыбатын салаатын сайыннарыыга сыһыаннаах үлэтигэр-хамнаһыгар туһаныаҕа, – диэн Андрей Михайлович иһитиннэрдэ.
Кини “Саха Өрөспүүбүлүкэтигэр тыа хаһаайыстыбатын потребительскай кэпэрээссийэтин үлэтин өйүүр уонна көҕүлүүр судаарыстыбаннай өйөбүл” туһунан сокуон барыла оҥоһуллубутун, Ил Түмэҥҥэ бастакы ааҕыыны ааспытын уонна билиҥҥитэ ситэриллэ сылдьатын кэпсээтэ. Ону сэргэ, парламентарий “Үөр сылгыны иитии туһунан”, “Саха Өрөспүүбүлүкэтигэр тыа хаһаайыстыбатын сайыннарыы туһунан”, о.д.а. сокуоннары уларытыыга, сайыннарыыга туох үлэ-хамнас бара турарын билиһиннэрдэ.
Маны таһынан, Андрей Михайлович “СӨ бэйэни салайыныы уорганнарыгар тыа хаһаайыстыбатын өйөбүлүн кэккэ боломуочуйаларын биэрии” туһунан сокуон барыла ахсынньы 1 күнүгэр диэри Ил Түмэҥҥэ иккиһин көрүллэн бигэргэниэхтээҕин бэлиэтээтэ.
– Тыа хаһаайыстыбата – төрүт дьырыкпыт. Онон билигин салааны сайыннарарга саҥа көдьүүстээх систиэмэ ирдэнэр, – диэтэ.
Тыа хаһаайыстыбатын миниистирэ Александр Атласов кэлэр 2021 сылтан кэтэх хаһаайыстыбалары өйүүргэ төһө кээмэйдээх субвенция оҥоһулларын туһунан иһитиннэрдэ. Ону таһынан, 2021-2022 сылларга салааны сайыннарыыга туох судаарыстыбаннай өйөбүллэр былааннаммыттарын сиһилии билиһиннэрдэ.
Мунньах кыттыылаахтара миниистиргэ уонна миниистир солбуйааччыларыгар элбэх боппуруоһу биэрдилэр уонна чопчу хоруйдары ыллылар.
Холобур, тыа хаһаайыстыбатын миниистирин солбуйааччы Василий Афанасьев: “Тыа сирин нэһилиэнньэтин дохуота аҕыйыа суоҕа”, – диэтэ. Ол курдук, өскөтүн быйыл 2 млрд 820 мөл. солк. көрүллүбүт эбит буоллаҕына, эһиил – 2 млрд. 860 мөл. солк. былааннаммыт. Маны таһынан Василий Владимирович: “Хас биирдии ыанар ынахха 1 млрд. 200 мөл. солк барар”, – диэн быһаарда.
“Төгүрүк остуол” түмүктүүр чааһыгар Андрей Находкин уонна мунньаҕы сүрүннээччи Мария Христофорова саҥа сокуон барылыгар этиилэри хомуйуу салгыы салҕанар диэн бэлиэтээтилэр.
Мунньах туһунан сиһилии “Ил Түмэн” хаһыат кэлэр 46 №-гэр ааҕаарыҥ.
-
0
-
0
-
0
-
0
-
0
-
0
