“Федеральнай бүддьүөт саҥа барыла социальнай хайысхалаах буолбут. Бастатан туран, РФ Бэрэсидьиэнин сородахтарын, национальнай бырайыактары уонна “Биир ньыгыл Арассыыйа” бэлитиичэскэй баартыйа бырайыактарын олоххо киллэрэргэ туһуламмыт.
Сааҥсыйалары, ньиэп сыанатын түһүүтүн уонна экэниэмикэҕэ үөскүү турар кыһалҕалары аахсыбакка, 2021-2023 сыллардааҕы бүддьүөт барылыгар хамнас, оҕолорго төлөбүр, доруобуйа харыстабылын систиэмэтин саҥардыы, оскуолалары тутуу, алын сүһүөх кылаас оҕолорун итии аһылыгынан хааччыйыы, уопсастыбаннай эйгэни уонна дьон олорор түөлбэлэрин сайыннарыы бүтүннүү киирбиттэр. Ол курдук, эһиилги сылга дьон олорор түөлбэлэрин сайыннарыыга, тупсарыыга 34 млрд. 650 мөл. солк. былааннаммыт. Дьадайыыны утары охсуһууга эбии үп-харчы көрүллүбүт. Үрдүк үөрэх кыһаларыгар бүддьүөт суотугар босхо үөрэнэргэ 11 тыһыынча миэстэ бэриллибит, ол эбэтэр оскуоланы бүтэрээччилэр 60 % босхо миэстэҕэ хапсыахтара.
Маны таһынан, оҕолоох ыаллары өйүүр миэрэлэр уонна 6,5 %-наах чэпчэтиилээх ипотека бырагырааматын болдьоҕо уһаабыттар. “Социальнай хантыраак” систиэмэтэ салгыы сайдар буолбут. Бүддьүөккэ уһулуччу болҕомто судаарыстыба көмүскэлигэр эрэйэр нэһилиэнньэ араҥатыгар ууруллубут. Холобур, тулаайах оҕолору дьиэлииргэ 2021 сылга 2,3 млрд. солк. былааннаммыт. Ити 2020 сыллааҕыттан үрдүк, элбэх.
Гражданнары эминэн хааччыйыыга, искэҥ ыарыыны, сүрэх-тымыр уонна орфаннай ыарыылары эмтээһиҥҥэ, үрдүк технологиялаах мэдиссиинэ көмөтүн оҥорууга үбүлээһин кээмэйэ улааппыт.
Бүддьүөт барылыгар тыа сиригэр олорор дьиэлэри тутууга 12,4 млрд. солк. көрүллүбүт, ону таһынан уһуйааннары, оскуолалары, доруобуйа харыстабылын уонна спорт эбийиэктэрин тутуу, уунан хааччыйыыны, канализацияны сайыннарыы, хочуолунайдары, суоллары өрөмүөннээһин, саҥардыы, сырдатыыны тардыы, сынньалаҥ түөлбэлэрин оҥоруу киирбиттэр.
Онон, судаарыстыбаннай ороскуот үс гыммыт биирэ социальнай хайысхаҕа барара былааннаммыт. Ол курдук, бу уустук кэмҥэ бүддьүөт нэһилиэнньэни өйөөһүҥҥэ, социальнай мэктиэлэри уонна РФ Бэрэсэдьиэнин эбэһээтилэстибэлэрин толорууга анаммыт.
Ити федеральнай сокуон барылыгар, федеральнай бүддьүөттэн кыттыгас үбүлээһининэн хааччылларга, өрөспүүбүлүкэ бүддьүөтүгэр быыбардааччыларбытыгар уонна баартыйаҕа уһулуччу суолталаах хайысхаларынан бэйэбит социальнай этиилэрбитин, көннөрүүлэрбитин киллэрэбит".
А.А. Григорьева,
Ил Түмэн Судаарыстыбаннай Мунньаҕар “Биир ньыгыл Арассыыйа” фракциятын салайааччыта.
-
0
-
0
-
0
-
0
-
0
-
0
